ವಾಷಿಂಗ್ಟನ್​: ಕಳೆದ ವಾರ ಉಕ್ರೇನ್​ ಅಧ್ಯಕ್ಷ ಝೆಲೆನ್ಸ್ಕಿ ಅವರನ್ನು ಅಮೆರಿಕ ಅಧ್ಯಕ್ಷ ಟ್ರಂಪ್​ ಡಿಕ್ಟೇಟರ್​ ಎಂದು ಕರೆದಿದ್ದರು. ಈ ಸಂಬಂಧ ಮಾಧ್ಯಮದವರು ಅಮೆರಿಕ ಅಧ್ಯಕ್ಷರನ್ನು ಪ್ರಶ್ನೆ ಮಾಡಿದ್ದು, ನೀವೇನಾದರೂ ಕ್ಷಮೆ ಕೇಳುವಿರಾ ಎಂಬ ಪ್ರಶ್ನೆಗೆ ಇಲ್ಲ ಎನ್ನುವ ಮೂಲಕ ತಳ್ಳಿ ಹಾಕಿದ್ದಾರೆ.

ಯುನೈಟೆಡ್​ ಕಿಂಗ್ಡಮ್​ ಪ್ರಧಾನಿ ಕೇರ್​​​​​​​​​​​ ಸ್ಮಾರ್ಮರ್​​​ ಅವರೊಂದಿಗೆ ನಡೆಸಿದ ಜಂಟಿ ಸುದ್ದಿಗೋಷ್ಠಿ ವೇಳೆ, ಕಳೆದ ವಾರ ಉಕ್ರೇನ್​ ಅಧ್ಯಕ್ಷ ವಿರುದ್ಧ ನೀಡಿದ್ದ ಹೇಳಿಕೆಯಿಂದ ಹಿಂದೆ ಸರಿಯಲು ನಿರಾಕರಿಸಿದರು. ಆದರೆ ಉಕ್ರೇನ್​ ಅಧ್ಯಕ್ಷರ ಬಗ್ಗೆ ಅಪಾರ ಗೌರವವಿದೆ. ಅವರು ರಷ್ಯಾ ವಿರುದ್ಧ ಧೈರ್ಯದಿಂದ ಹೋರಾಡಿದ್ದಾರೆ ಎಂದು ಹೇಳಿದ್ದಾರೆ.

ಅಷ್ಟೇ ಅಲ್ಲ ಮುಂದೆ ಅವರೊಂದಿಗೆ ಉತ್ತಮ ಸಭೆ ನಡೆಯಲಿದೆ ಎಂಬ ವಿಶ್ವಾಸ ಇದೆ. ಅವರೊಂದಿಗೆ ಉತ್ತಮ ಸಂಬಂಧ ಹೊಂದಿದ್ದೇವೆ, ಈ ಬಾಂಧವ್ಯ ಹೀಗೆ ಮುಂದುವರೆಯಲಿದೆ. ಅಮೆರಿಕ ಅವರ ಬಗ್ಗೆ ಗೌರವ ಹೊಂದಿದೆ. ನಾನೂ ಸಹ ಝೆಲೆನ್ಸ್ಕಿ ಅವರ ಮೇಲೆ ಗೌರವ ಇಟ್ಟುಕೊಂಡಿದ್ದೇನೆ. ನಾವು ಅವರಿಗೆ ಅಪಾರ ಪ್ರಮಾಣದ ಉಪಕರಣಗಳನ್ನು ಹಾಗೂ ಹಣವನ್ನು ನೀಡಿದ್ದೇವೆ. ಅವರು ಸಹ ಧೈರ್ಯದಿಂದ ಹೋರಾಡಿದ್ದಾರೆ ಎಂದು ಡೊನಾಲ್ಡ್​ ಟ್ರಂಪ್​ ಹೇಳಿದ್ದಾರೆ.

ಇಂದು ಶ್ವೇತಭವನದಲ್ಲಿ ಟ್ರಂಪ್​ ಅವರನ್ನು ಉಕ್ರೇನ್​ ಅಧ್ಯಕ್ಷ ಝೆಲೆನ್ಸ್ಕಿ ಭೇಟಿ ಮಾಡಿ ಮಾತುಕತೆ ನಡೆಸಲಿದ್ದಾರೆ. ಉಕ್ರೇನ್‌ನ ಖನಿಜ ನಿಕ್ಷೇಪಗಳ ಮೇಲೆ ಅಮೆರಿಕದ ಹಕ್ಕುಗಳನ್ನು ಸಾಧಿಸುವ ಪ್ರಸ್ತಾಪಕ್ಕೆ ಆರಂಭದಲ್ಲಿ ಕೀವ್​ ನಿರಾಕರಿಸಿತ್ತು. ಹೀಗಾಗಿ ಟ್ರಂಪ್​ ಉಕ್ರೇನ್​ ಅಧ್ಯಕ್ಷರ ವಿರುದ್ಧ ವಾಗ್ದಾಳಿ ನಡೆಸಿದ್ದರು. ಅಷ್ಟೇ ಅಲ್ಲ ವಿಶ್ವಸಂಸ್ಥೆಯಲ್ಲಿ ರಷ್ಯಾ ವಿರುದ್ಧ ಮಂಡಿಸಿದ ನಿರ್ಣಯದ ವಿರೋಧವಾಗಿ ಅಮೆರಿಕ ಮತ ಚಲಾಯಿಸಿತ್ತು.

ಕೀವ್​​ ಅಪ್ಪಣೆ ಪಡೆಯದೇ ಉಕ್ರೇನ್​ - ರಷ್ಯಾ ಯುದ್ಧ ಕೊನೆಗೊಳಿಸಲು ಡೊನಾಲ್ಡ್​ ಟ್ರಂಪ್​ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್​ ಪುಟಿನ್​ ಜತೆ ಮಾತುಕತೆಗೆ ಮುಂದಾಗಿದ್ದರು. ಈ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಉಕ್ರೇನ್​- ಅಮೆರಿಕ ನಡುವಣ ಬಾಂಧವ್ಯ ತುಸು ಒತ್ತಡದಲ್ಲಿತ್ತು. ಈ ಎಲ್ಲ ಬೆಳವಣಿಗೆಗಳ ಬಳಿಕ ಅಮೆರಿಕ ಅಧ್ಯಕ್ಷರನ್ನು ಉಕ್ರೇನ್​ ಅಧ್ಯಕ್ಷರು ಭೇಟಿ ಮಾಡುತ್ತಿದ್ದಾರೆ.