ಸಿರಿಯಾ : ವಿವಿಧ ದಿಕ್ಕುಗಳಿಂದ ಆಕ್ರಮಣ ನಡೆಸಿರುವ ಬಂಡುಕೋರ ಪಡೆಗಳು ಹಮಾ ನಗರದೊಳಗೆ ಪ್ರವೇಶಿಸಿವೆ ಎಂದು ಸಿರಿಯನ್ ಸೇನೆ ಗುರುವಾರ ಒಪ್ಪಿಕೊಂಡಿದೆ. ಈ ಮೂಲಕ ಅಧ್ಯಕ್ಷ ಬಶರ್ ಅಲ್ ಅಸಾದ್ ಅವರಿಗೆ ತೀವ್ರ ಹಿನ್ನಡೆಯಾದಂತಾಗಿದೆ. ಬಂಡುಕೋರ ಪಡೆಗಳೊಂದಿಗೆ ತೀವ್ರ ಹೋರಾಟದ ನಂತರ ಪಶ್ಚಿಮ - ಮಧ್ಯ ಸಿರಿಯಾದ ನಗರ ಹಮಾದ ಹೊರಗೆ ತನ್ನ ಪಡೆಗಳನ್ನು ಮರು ನಿಯೋಜಿಸಿರುವುದಾಗಿ ಸೇನೆ ಹೇಳಿಕೊಂಡಿದೆ.

"ಹಮಾ ನಗರದ ಮೇಲೆ ವಿವಿಧ ದಿಕ್ಕುಗಳಿಂದ ಅಧಿಕ ಸಂಖ್ಯೆಯಲ್ಲಿ ಭಯೋತ್ಪಾದಕ ಸಂಘಟನೆಗಳು ಪ್ರಾರಂಭಿಸಿದ ಹಿಂಸಾತ್ಮಕ ಮತ್ತು ಸತತ ದಾಳಿಗಳನ್ನು ಹಿಮ್ಮೆಟ್ಟಿಸಲು ನಮ್ಮ ಸಶಸ್ತ್ರ ಪಡೆಗಳು ಹೋರಾಟ ನಡೆಸುತ್ತಿವೆ" ಎಂದು ಸೇನೆ ಮತ್ತು ಸಶಸ್ತ್ರ ಪಡೆಗಳ ಸಿರಿಯನ್ ಜನರಲ್ ಕಮಾಂಡ್ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಹಮಾದಿಂದ ಸರ್ಕಾರಿ ಮಿಲಿಟರಿ ಹಿಂದೆ ಸರಿದ ನಂತರ ಎರಡನೇ ಪ್ರಮುಖ ನಗರ ಹಮಾ ಮೇಲೆ ಸಂಪೂರ್ಣ ನಿಯಂತ್ರಣ ಸಾಧಿಸಿರುವುದಾಗಿ ಸಿರಿಯನ್ ಬಂಡುಕೋರರು ಹೇಳಿದ್ದಾರೆ. ಹಮಾದಲ್ಲಿ ವಿಜಯ ದಾಖಲಿಸಲಾಗಿದ್ದು, ಯಾರ ಮೇಲೆಯೂ ಸೇಡಿನ ಕ್ರಮ ತೆಗೆದುಕೊಳ್ಳುವುದಿಲ್ಲ ಎಂದು ಇಸ್ಲಾಮಿಕ್ ಉಗ್ರಗಾಮಿ ಗುಂಪು ಹಯಾತ್ ತಹ್ರಿರ್ ಅಲ್-ಶಾಮ್ (ಎಚ್​ಟಿಎಸ್) ನಾಯಕ ಅಬು ಮೊಹಮ್ಮದ್ ಅಲ್-ಜವ್ಲಾನಿ ಹೇಳಿದ್ದಾರೆ.

.