ನವದೆಹಲಿ : ಇಂದಿನ ದಿನಗಳಲ್ಲಿ ಆಹಾರಕ್ಕಿಂತ ಸೌಂದರ್ಯವರ್ಧಕ ಉತ್ಪನ್ನಗಳಿಗೇ ಹೆಚ್ಚಿನ ಪ್ರಾಮುಖ್ಯತೆ ನೀಡುವ ಜನರ ಸಂಖ್ಯೆ ಹೆಚ್ಚಾಗುತ್ತಿದೆ. ಕೈಯಲ್ಲಿ ಕಾಸಿಲ್ಲದಿದ್ದರೂ ಸಾಲ ಮಾಡಿ ದುಬಾರಿ ಬೆಲೆಯ ಸೋಪು, ಶ್ಯಾಂಪೂ ಹಾಗೂ ಫೇಸ್‌ವಾಶ್ ಖರೀದಿಸುವ ಅಭ್ಯಾಸ ಅನೇಕರಲ್ಲಿ ಬೆಳೆದಿದೆ. ಈ ವಾತಾವರಣದಲ್ಲಿ ಭಾರತ ಸರ್ಕಾರವು ‘ಪ್ರಧಾನ ಮಂತ್ರಿ ಭಾರತೀಯ ಜನೌಷಧಿ ಪರಿಯೋಜನಾ’ (PMBJP) ಅಡಿಯಲ್ಲಿ ಸಾಮಾನ್ಯ ಜನರಿಗೆ ಕೈಗೆಟುಕುವ ಬೆಲೆಯಲ್ಲಿ ಅತ್ಯುನ್ನತ ಗುಣಮಟ್ಟದ ಫೇಸ್ ವಾಶ್ ಪರಿಚಯಿಸಿ ಭಾರಿ ಗಮನ ಸೆಳೆದಿದೆ.

ಸಾಮಾಜಿಕ ಜಾಲತಾಣ 'X' ನಲ್ಲಿ ಘೋಷಿಸಲಾದ ಈ ವಿಶೇಷ ಉತ್ಪನ್ನಗಳು ಸ್ಯಾಲಿಸಿಲಿಕ್ ಆಮ್ಲವನ್ನು ಹೊಂದಿದ್ದು, 1% ಮತ್ತು 2% ಫೋಮಿಂಗ್ ಫೇಸ್ ವಾಶ್ ರೂಪಾಂತರಗಳಲ್ಲಿ ಲಭ್ಯವಿವೆ. ಇವು ದೇಶಾದ್ಯಂತ ಇರುವ ಜನೌಷಧಿ ಕೇಂದ್ರಗಳಲ್ಲಿ ಕ್ರಮವಾಗಿ ಕೇವಲ ₹46.88 ಹಾಗೂ ₹65.63 ರಂತೆ ಮಾರಾಟವಾಗುತ್ತಿವೆ. ಚರ್ಮದ ರಂಧ್ರಗಳನ್ನು ಆಳವಾಗಿ ಸ್ವಚ್ಛಗೊಳಿಸುವುದು, ಚರ್ಮದ ಹೆಚ್ಚುವರಿ ಎಣ್ಣೆಯನ್ನು ನಿಯಂತ್ರಿಸುವುದು ಮತ್ತು ಮೊಡವೆಗಳು ಬರದಂತೆ ತಡೆಯುವ ನಿಟ್ಟಿನಲ್ಲಿ ಇವುಗಳನ್ನು ವಿಶೇಷವಾಗಿ ರೂಪಿಸಲಾಗಿದೆ.

ಚರ್ಮರೋಗ ತಜ್ಞರ ಪ್ರಕಾರ 2% ಸಾಂದ್ರತೆಯ ಸ್ಯಾಲಿಸಿಲಿಕ್ ಆಮ್ಲವು ಮೊಡವೆ ಪೀಡಿತ ಮತ್ತು ಎಣ್ಣೆಯುಕ್ತ ಚರ್ಮಕ್ಕೆ ಅತ್ಯಂತ ಸೂಕ್ತವಾದ ಹಾಗೂ ವೈದ್ಯಕೀಯವಾಗಿ ದೃಢಪಟ್ಟ ಘಟಕಾಂಶವಾಗಿದೆ. ಹೀಗಾಗಿ ಇದು ಕೇವಲ ಒಂದು ಅಗ್ಗದ ಪರ್ಯಾಯವಾಗಿರದೆ, ವೈದ್ಯಕೀಯ ಮೌಲ್ಯವಿರುವ ಪರಿಣಾಮಕಾರಿ ಉತ್ಪನ್ನವಾಗಿದೆ. ಮಾರುಕಟ್ಟೆಯಲ್ಲಿ ಲಭ್ಯವಿರುವ 'ಮಿನಿಮಲಿಸ್ಟ್' ಹಾಗೂ 'ದಿ ಡರ್ಮಾ ಕೋ' ನಂತಹ ಖಾಸಗಿ ಕಂಪನಿಗಳ ಇದೇ ಮಾದರಿಯ ಫೇಸ್‌ವಾಶ್‌ಗಳ ಬೆಲೆ ₹300 ರಿಂದ ₹600 ವರೆಗಿದೆ. ಪ್ರೀಮಿಯಂ ಬ್ರ್ಯಾಂಡ್‌ಗಳಿಗಿಂತ ಭಾರಿ ಕಡಿಮೆ ಬೆಲೆಗೆ ಇಂತಹ ಗುಣಮಟ್ಟದ ಉತ್ಪನ್ನ ಸಿಗುತ್ತಿರುವುದು ಗ್ರಾಹಕರಲ್ಲಿ ಆಶ್ಚರ್ಯ ಮತ್ತು ಸಂತಸ ಮೂಡಿಸಿದೆ.