ಜಾಹೀರಾತು
ಪಾಟ್ನಾ: ಮಹಾರಾಷ್ಟ್ರ ಮತ್ತು ಕರ್ನಾಟಕದ ವಿವಿಧ ಮದರಸಾಗಳಲ್ಲಿ ಶಿಕ್ಷಣ ಪಡೆಯಲು ತೆರಳುತ್ತಿದ್ದ ಬಿಹಾರದ ಸುಮಾರು 163 ಮಕ್ಕಳನ್ನು ಮಧ್ಯಪ್ರದೇಶದ ರೈಲ್ವೆ ಪೊಲೀಸರು ವಶಕ್ಕೆ ಪಡೆದು, ಸುಮಾರು ಎರಡು ವಾರಗಳ ಕಾಲ ಆಶ್ರಯ ತಾಣಗಳಲ್ಲಿರಿಸಿದ್ದ ಘಟನೆ ವರದಿಯಾಗಿದೆ. ಸಾಮಾಜಿಕವಾಗಿ ಮತ್ತು ಆರ್ಥಿಕವಾಗಿ ಹಿಂದುಳಿದ ಬಿಹಾರದ ಅರಾರಿಯಾ, ಪೂರ್ಣಿಯಾ, ಕಿಶನ್ಗಂಜ್ ಮತ್ತು ಸುಪಾಲ್ ಜಿಲ್ಲೆಗಳಿಗೆ ಸೇರಿದ 6 ರಿಂದ 15 ವರ್ಷದೊಳಗಿನ ಈ ಮಕ್ಕಳು ಎಪ್ರಿಲ್ 11ರಂದು ಪಾಟ್ನಾದಿಂದ ರೈಲು ಪ್ರಯಾಣ ಆರಂಭಿಸಿದ್ದರು. ಎಂಟು ಮಂದಿ ಮದರಸಾ ಶಿಕ್ಷಕರ ಮೇಲ್ವಿಚಾರಣೆಯಲ್ಲಿ ಈ ಮಕ್ಕಳನ್ನು ಮಹಾರಾಷ್ಟ್ರದ ನಾಂದೇಡ್, ಉದ್ಗೀರ್ ಹಾಗೂ ಕರ್ನಾಟಕದ ಬೀದರ್ನಲ್ಲಿರುವ ಮದರಸಾ ದಾರುಲ್ ಉಲೂಮ್ ಇಮ್ದಾದಿಯಕ್ಕೆ ಕರೆದೊಯ್ಯಲಾಗುತ್ತಿತ್ತು.
ಪ್ರಯಾಣದ ವೇಳೆ ಪಾಟ್ನಾ ಮತ್ತು ಪ್ರಯಾಗ್ರಾಜ್ ಜಂಕ್ಷನ್ಗಳಲ್ಲಿ ರೈಲ್ವೆ ಪೊಲೀಸರು ದಾಖಲೆಗಳನ್ನು ಪರಿಶೀಲಿಸಿ ಮುಂದುವರಿಯಲು ಅನುಮತಿ ನೀಡಿದ್ದರೂ, ರೈಲು ಮಧ್ಯಪ್ರದೇಶದ ಕಟ್ನಿ ಜಂಕ್ಷನ್ ತಲುಪಿದಾಗ ಆರ್ಪಿಎಫ್ ಮತ್ತು ಜಿಆರ್ಪಿ ಪೊಲೀಸರು ಮಕ್ಕಳನ್ನು ಕೆಳಗಿಳಿಸಿ ವಶಕ್ಕೆ ಪಡೆದಿದ್ದರು. ಮಕ್ಕಳ ಕಲ್ಯಾಣ ಸಮಿತಿಯ (CWC) ನೀಡಿದ ಮಾಹಿತಿಯ ಮೇರೆಗೆ ಈ ಕ್ರಮ ಕೈಗೊಳ್ಳಲಾಗಿದ್ದು, ಶಿಕ್ಷಕರು ಮತ್ತು ಪೋಷಕರು ಎಷ್ಟೇ ಮನವಿ ಮಾಡಿದರೂ ಪೊಲೀಸರು ಸ್ಪಂದಿಸಿರಲಿಲ್ಲ ಎಂದು ಆರೋಪಿಸಲಾಗಿದೆ. ಕಟ್ನಿ ರೈಲ್ವೆ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಿ, ಮಕ್ಕಳೊಂದಿಗೆ ಬಂದಿದ್ದ ಎಂಟು ಮಂದಿಯ ಮೇಲೆ ಮಾನವ ಕಳ್ಳಸಾಗಣೆ ಮತ್ತು ಅಪಹರಣದಂತಹ ಗಂಭೀರ ಆರೋಪಗಳನ್ನು ಹೊರಿಸಲಾಗಿತ್ತು. ತದನಂತರ ಮಕ್ಕಳನ್ನು ಜಬಲ್ಪುರ ಮತ್ತು ಕಟ್ನಿಯ ವಿವಿಧ ಮಕ್ಕಳ ಆರೈಕೆ ಕೇಂದ್ರಗಳಿಗೆ ಸ್ಥಳಾಂತರಿಸಲಾಗಿತ್ತು.
ಈ ಇಡೀ ಘಟನೆಯು ಕೇವಲ ಸಂಶಯದ ಆಧಾರದ ಮೇಲೆ ನಡೆದಿದ್ದು, ಮಕ್ಕಳನ್ನು ಗುರಿಯಾಗಿಸಿಕೊಂಡು ಈ ಅವ್ಯವಸ್ಥೆ ಸೃಷ್ಟಿಸಲಾಗಿದೆ ಎಂದು ಪೋಷಕರು ಮತ್ತು ಸಾಮಾಜಿಕ ಸಂಘಟನೆಗಳು ಆಕ್ರೋಶ ವ್ಯಕ್ತಪಡಿಸಿವೆ. ಮದರಸಾಗಳ ವಿರುದ್ಧದ ತಪ್ಪು ಕಲ್ಪನೆ ಮತ್ತು ಕೋಮು ದೃಷ್ಟಿಕೋನವೇ ಈ ಕಾನೂನು ಕ್ರಮಕ್ಕೆ ಕಾರಣವೆಂದು ಜನ್ ಜಾಗರಣ್ ಶಕ್ತಿ ಸಂಘಟನೆಯ ರಮೀಜ್ ರೆಜಾ ದೂರಿದ್ದಾರೆ. ತನಿಖೆಯ ನಂತರ ಮಕ್ಕಳು ನಿಜವಾಗಿಯೂ ಶಿಕ್ಷಣಕ್ಕಾಗಿ ಮದರಸಾಗಳಿಗೆ ತೆರಳುತ್ತಿದ್ದರು ಎಂಬುದು ದೃಢಪಟ್ಟಿದ್ದು, ಪ್ರಕರಣದ ಮುಕ್ತಾಯದ ವರದಿ ಸಲ್ಲಿಕೆಯಾಗುವವರೆಗೆ ಪೋಷಕರು ಮಕ್ಕಳನ್ನು ನಿಯಮಿತವಾಗಿ ಮಕ್ಕಳ ಕಲ್ಯಾಣ ಸಮಿತಿಯ ಮುಂದೆ ಹಾಜರುಪಡಿಸುವಂತೆ ಸೂಚಿಸಿ ಬಿಡುಗಡೆ ಮಾಡಲಾಗಿದೆ.
