ನವದೆಹಲಿ : ಜಾಗತಿಕ ರಾಜಕೀಯದಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ ಎರಡು ವಾರಗಳ ಕದನ ವಿರಾಮವು ಒಂದು ಅಚ್ಚರಿಯ ಬೆಳವಣಿಗೆಯಾಗಿ ಹೊರಹೊಮ್ಮಿದೆ. ಆದರೆ, ಈ ಶಾಂತಿ ಪ್ರಕ್ರಿಯೆಯ ಹಿಂದೆ ಯಾರ ಕೈವಾಡವಿದೆ ಎಂಬ ಪ್ರಶ್ನೆ ಈಗ ದೊಡ್ಡ ರಾಜತಾಂತ್ರಿಕ ಸಂಘರ್ಷಕ್ಕೆ ನಾಂದಿ ಹಾಡಿದೆ. ಪಾಕಿಸ್ತಾನವು ತನಗೆ ಬೇಕಾದಂತೆ ವಿಚಾರಗಳನ್ನು ತಿರುಚಿದೆ ಎನ್ನುವ ಆರೋಪ ಕೇಳಿಬಂದಿದೆ. ಲೆಬನಾನ್ ಮೇಲೆ ದಾಳಿ ಮಾಡಬೇಡಿ ಎನ್ನುವ ಷರತ್ತು ಕೂಡ ಅಮೆರಿಕಕ್ಕೆ ಇರಾನ್ ನೀಡಿದ್ದ ಷರತ್ತುಗಳ ಪಟ್ಟಿಯಲ್ಲಿತ್ತು ಎಂದು ಇರಾನ್ ಹೇಳಿದೆ ಆದರೆ ಅಮೆರಿಕ ಹೇಳುವ ಪ್ರಕಾರ ಆ ಪಟ್ಟಿಯಲ್ಲಿ ಲೆಬನಾನ್ ಹೆಸರಿರಲಿಲ್ಲ. ಇದರಲ್ಲಿ ಪಾಕಿಸ್ತಾನದ ಕೈವಾಡವಿರುವುದು ಸ್ಪಷ್ಟವಾಗುತ್ತಿದೆ. ಈ ಇಡೀ ನಾಟಕದ ಕೇಂದ್ರಬಿಂದುವಾಗಿ ಇಸ್ಲಾಮಾಬಾದ್ ತನ್ನನ್ನು ತಾನು ಬಿಂಬಿಸಿಕೊಳ್ಳುತ್ತಿದೆ. ಆದರೆ ಇಸ್ರೇಲ್ ಇದನ್ನು ಸ್ಪಷ್ಟವಾಗಿ ತಳ್ಳಿಹಾಕಿದೆ. ಭಾರತದಲ್ಲಿನ ಇಸ್ರೇಲ್ ರಾಯಭಾರಿ ರುವೆನ್ ಅಜರ್ ಅವರು ಪಾಕಿಸ್ತಾನದ ವಿಶ್ವಾಸಾರ್ಹತೆಯನ್ನು ಬಹಿರಂಗವಾಗಿಯೇ ಪ್ರಶ್ನಿಸಿದ್ದಾರೆ. ನಾವು ಪಾಕಿಸ್ತಾನವನ್ನು ಒಬ್ಬ ವಿಶ್ವಾಸಾರ್ಹ ಆಟಗಾರನಾಗಿ ನೋಡುವುದಿಲ್ಲ. ಹಿಂದೆ ಅಮೆರಿಕವು ಕತಾರ್ ಅಥವಾ ಟರ್ಕಿಯಂತಹ ರಾಷ್ಟ್ರಗಳ ಮೂಲಕ ಅನಿವಾರ್ಯವಾಗಿ ಮಾತುಕತೆ ನಡೆಸಿರಬಹುದು, ಆದರೆ ಅದರ ಅರ್ಥ ಪಾಕಿಸ್ತಾನದ ಪಾತ್ರಕ್ಕೆ ಸಿಕ್ಕ ಅನುಮೋದನೆ ಎಂದಲ್ಲ, ಎಂದು ಅಜರ್ ಗುಡುಗಿದ್ದಾರೆ. ಅವರ ಪ್ರಕಾರ, ಅಮೆರಿಕದ ನಿರ್ಧಾರಗಳು ಕೇವಲ ಕಾರ್ಯತಂತ್ರದ ಆಯ್ಕೆಗಳೇ ಹೊರತು ಪಾಕಿಸ್ತಾನದ ಮೇಲಿನ ನಂಬಿಕೆಯಲ್ಲ.

ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಮತ್ತು ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರು ಈ ಕದನ ವಿರಾಮದ ಸಂಪೂರ್ಣ ಕ್ರೆಡಿಟ್ ಪಡೆಯಲು ಹವಣಿಸುತ್ತಿದೆ. ಆದರೆ, ಕದನ ವಿರಾಮ ಘೋಷಣೆಯಾಗುವ ಕೆಲವೇ ಗಂಟೆಗಳ ಮೊದಲು ಷರೀಫ್ ಅವರು ಮಾಡಿದ ಸಾಮಾಜಿಕ ಜಾಲತಾಣದ ಪೋಸ್ಟ್ ಈಗ ಅವರಿಗೆ ಉರುಳಾಗಿದೆ. ರಾಜತಾಂತ್ರಿಕತೆಗಾಗಿ ಅವರು ನೀಡಿದ ಕರೆ, ಒಪ್ಪಂದದ ಸಾರಾಂಶಕ್ಕಿಂತ ಹೆಚ್ಚಾಗಿ ಪ್ರಚಾರದ ಹಪಾಹಪಿಯಂತೆ ಕಾಣುತ್ತಿದೆ ಎಂದು ತಜ್ಞರು ವಿಶ್ಲೇಷಿಸುತ್ತಿದ್ದಾರೆ. ಅಮೆರಿಕದ ಜೋನಾಥನ್ ಸ್ಕ್ಯಾಂಜರ್ ಅವರು ಪಾಕಿಸ್ತಾನದ ಈ ಹಠಾತ್ ‘ಶಾಂತಿ ಧೂತ’ನ ಅವತಾರದ ಹಿಂದೆ ಚೀನಾದ ನೆರಳು ಇರುವುದನ್ನು ಪತ್ತೆಹಚ್ಚಿದ್ದಾರೆ. ಅಮೆರಿಕದ ಆಡಳಿತದ ಒಳಗೂ ಎಲ್ಲವೂ ಸರಿಯಿದ್ದಂತಿಲ್ಲ. ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅವರಿಗೆ ಈ ಒಪ್ಪಂದದ ಬಗ್ಗೆ ತಡವಾಗಿ ಮಾಹಿತಿ ನೀಡಲಾಗಿದೆ ಎಂಬ ವರದಿಗಳು ವಾಷಿಂಗ್ಟನ್‌ನ ಆಂತರಿಕ ರಾಜಕೀಯದ ಓರೆಕೋರೆಗಳನ್ನು ಬಯಲು ಮಾಡಿವೆ. ವಿದೇಶಿ ಹಸ್ತಕ್ಷೇಪದ ಬಗ್ಗೆ ಕಟುವಾದ ನಿಲುವು ಹೊಂದಿರುವ ವ್ಯಾನ್ಸ್ ಅವರನ್ನು ಈ ಪ್ರಕ್ರಿಯೆಯಿಂದ ದೂರ ಇಟ್ಟಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.