ನವದೆಹಲಿ : ಭಾರತದ ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ತರುವಂತಹ ಬೃಹತ್ ಅಂತರಾಷ್ಟ್ರೀಯ ಸಂಚೊಂದನ್ನು ರಾಷ್ಟ್ರೀಯ ತನಿಖಾ ದಳ (NIA) ಬಯಲಿಗೆಳೆದಿದೆ. ಈಶಾನ್ಯ ಭಾರತದ ಮೂಲಕ ಮ್ಯಾನ್ಮಾರ್‌ಗೆ ಅಕ್ರಮವಾಗಿ ನುಸುಳಿ, ನಿಷೇಧಿತ ಉಗ್ರಗಾಮಿ ಸಂಘಟನೆಗಳಿಗೆ ತರಬೇತಿ ನೀಡಲು ಸಂಚು ರೂಪಿಸಿದ್ದ ಆರೋಪದ ಮೇಲೆ ಅಮೆರಿಕದ ಕುಖ್ಯಾತ ಮರ್ಸಿನರಿ (ಬಾಡಿಗೆ ಸೈನಿಕ) ಮ್ಯಾಥ್ಯೂ ವ್ಯಾನ್‌ಡೈಕ್ ಸೇರಿದಂತೆ ಏಳು ವಿದೇಶಿಯರನ್ನು ಭಾರತೀಯ ಭದ್ರತಾ ಪಡೆಗಳು ಬಂಧಿಸಿವೆ. ಮೇಲ್ನೋಟಕ್ಕೆ ಅನಿಮೇಷನ್ ಫಿಲ್ಮ್ ಮೇಕರ್, ಭದ್ರತಾ ವಿಶ್ಲೇಷಕ ಮತ್ತು ಯುದ್ಧ ವರದಿಗಾರ ಎಂದು ಗುರುತಿಸಿಕೊಂಡಿದ್ದ ವ್ಯಾನ್‌ಡೈಕ್, ವಾಸ್ತವದಲ್ಲಿ ಒಬ್ಬ 'ಶ್ಯಾಡೋ ಆಪರೇಟಿವ್' (ನೆರಳಿನಂತೆ ಕೆಲಸ ಮಾಡುವ ಗುಪ್ತಚರ). ಅಮೆರಿಕದ ಸೇನೆಯೊಂದಿಗೆ ನಿಕಟ ಸಂಪರ್ಕ ಹೊಂದಿರುವ ಈತ, ಇರಾಕ್ ಮತ್ತು ಲಿಬಿಯಾ ಯುದ್ಧಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿದ್ದ ಹಳೆಯ ಇತಿಹಾಸ ಹೊಂದಿದ್ದಾನೆ. ಈತ 'ಸನ್ಸ್ ಆಫ್ ಲಿಬರ್ಟಿ ಇಂಟರ್ನ್ಯಾಷನಲ್' (SOLI) ಎಂಬ ಖಾಸಗಿ ಮಿಲಿಟರಿ ತರಬೇತಿ ಸಂಸ್ಥೆಯನ್ನು ಸ್ಥಾಪಿಸಿ, ಜಗತ್ತಿನಾದ್ಯಂತ ಬಂಡುಕೋರರಿಗೆ 'ಸ್ಪೆಷಲ್ ಫೋರ್ಸ್' ಮಾದರಿಯ ತರಬೇತಿ ನೀಡುತ್ತಿದ್ದನು. ತನಿಖಾ ಮೂಲಗಳ ಪ್ರಕಾರ, ವ್ಯಾನ್‌ಡೈಕ್ ಈಶಾನ್ಯ ಭಾರತದ ಗಡಿಗಳನ್ನು ಬಳಸಿ ಮ್ಯಾನ್ಮಾರ್‌ಗೆ ನುಸುಳುತ್ತಿದ್ದನು. ಅಲ್ಲಿನ ಜನಾಂಗೀಯ ಸಶಸ್ತ್ರ ಗುಂಪುಗಳಿಗೆ (Ethnic Armed Groups) ಮಾತ್ರವಲ್ಲದೆ, ಭಾರತದಲ್ಲಿ ನಿಷೇಧಕ್ಕೊಳಗಾದ ಕೆಲವು ಉಗ್ರಗಾಮಿ ಸಂಘಟನೆಗಳಿಗೂ ಈತ ಆಧುನಿಕ ಯುದ್ಧತಂತ್ರಗಳ ತರಬೇತಿ ನೀಡುತ್ತಿದ್ದ ಎನ್ನಲಾಗಿದೆ.