ಚೆನ್ನೈ: ತಮಿಳುನಾಡು ಉಪಮುಖ್ಯಮಂತ್ರಿ ಉದಯನಿಧಿ ಸ್ಟಾಲಿನ್ ನೀಡಿದ್ದ ಸನಾತನ ಧರ್ಮದ ಕುರಿತಾದ ವಿವಾದಾತ್ಮಕ ಹೇಳಿಕೆಗಳನ್ನು ಟೀಕಿಸಿದ್ದ ಬಿಜೆಪಿ ಐಟಿ ಸೆಲ್ ಮುಖ್ಯಸ್ಥ ಅಮಿತ್ ಮಾಳವೀಯ ವಿರುದ್ಧದ ಪ್ರಕರಣವನ್ನು ಮದ್ರಾಸ್ ಹೈಕೋರ್ಟ್​ ವಜಾಗೊಳಿಸಿದೆ. ಡಿಸಿಎಂ ಉದಯನಿಧಿ ಭಾಷಣ ದ್ವೇಷ ಭಾಷಣಕ್ಕೆ ಸಮನಾಗಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದ್ದು, ಮಾಳವೀಯ ಅರ್ಜಿಯನ್ನು ಮಾನ್ಯ ಮಾಡಿದ ನ್ಯಾಯಮೂರ್ತಿ ಎಸ್ ಶ್ರೀಮತಿ, ಉದಯನಿಧಿಯವರ 2023 ರ ಹೇಳಿಕೆಗಳನ್ನು ನರಮೇಧಕ್ಕೆ ಕರೆ ಎಂದು ವಿವರಿಸಿದ ಪೋಸ್ಟ್ ಯಾವುದೇ ಕ್ರಿಮಿನಲ್ ಅಪರಾಧವಲ್ಲ ಎಂದು ತೀರ್ಪು ನೀಡಿದರು. ಉದಯನಿಧಿ ಭಾಷಣವು ಸನಾತನ ಧರ್ಮವನ್ನು ಅನುಸರಿಸುವ ಹಿಂದೂಗಳನ್ನು ಗುರಿಯಾಗಿಸಿಕೊಂಡಿದೆ ಮತ್ತು ಮಾಳವೀಯ ಸ್ವತಃ ಅನುಯಾಯಿಯಾಗಿರುವುದರಿಂದ ಅಂತಹ ಹೇಳಿಕೆಗಳ ಸಂತ್ರಸ್ತನಾಗಿ ಕಾಣಬಹುದು ಎಂದು ನ್ಯಾಯಾಧೀಶರು ಅಭಿಪ್ರಾಯಪಟ್ಟಿದ್ದಾರೆ.

ಅಮಿತ್​ ಮಾಳವೀಯ ವಿರುದ್ಧ ದ್ವೇಷ ಮತ್ತು ಸಾರ್ವಜನಿಕ ಕಿಡಿಗೇಡಿತನವನ್ನು ಉತ್ತೇಜಿಸುವುದು ಸೇರಿದಂತೆ ಹಲವಾರು ಐಪಿಸಿ ವಿಭಾಗಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಭಾಷಣಕ್ಕೆ ಪ್ರತಿಕ್ರಿಯಿಸಿದ ವ್ಯಕ್ತಿಗಳ ವಿರುದ್ಧ ಮಾತ್ರ ಕ್ರಮ ಕೈಗೊಳ್ಳಲಾಗಿದೆಯೇ ಹೊರತು, ಹೇಳಿಕೆ ನೀಡಿದ ವ್ಯಕ್ತಿಯ ವಿರುದ್ಧವಲ್ಲ ಎನ್ನುವುದನ್ನು ನ್ಯಾಯಾಲಯ ಗಮನಿಸಿದ್ದು, ನ್ಯಾಯಾಲಯಗಳು ಪ್ರತಿಕ್ರಿಯಿಸಿದವರನ್ನು ಪ್ರಶ್ನಿಸುತ್ತಿವೆ, ಆದರೆ ದ್ವೇಷ ಭಾಷಣವನ್ನು ಪ್ರಾರಂಭಿಸಿದ ವ್ಯಕ್ತಿಯ ವಿರುದ್ಧ ಕಾನೂನು ಜಾರಿಗೆ ತರುತ್ತಿಲ್ಲ ಎಂದು ನ್ಯಾಯಮೂರ್ತಿ ಶ್ರೀಮತಿ ಹೇಳಿದರು. ಅಮಿತ್​ ಮಾಳವೀಯ ಪರ ವಕೀಲರು ಎತ್ತಿ ತೋರಿಸಿದ ಇತಿಹಾಸವನ್ನು ನ್ಯಾಯಾಧೀಶರು ಉಲ್ಲೇಖಿಸಿದ್ದು, ದ್ರಾವಿಡ ಕಳಗಂ ಮತ್ತು ನಂತರ ಡಿಎಂಕೆಯಿಂದ ಹಿಂದೂ ಧರ್ಮಕ್ಕೆ ದೀರ್ಘಕಾಲದ ಸೈದ್ಧಾಂತಿಕ ವಿರೋಧವನ್ನು ಸೂಚಿಸಿದರು. ಆ ಸಂದರ್ಭದಲ್ಲಿ, ಮಾಳವೀಯ ಅವರ ಪೋಸ್ಟ್ ದ್ವೇಷವನ್ನು ಸೃಷ್ಟಿಸುವ ಬದಲು ಸಚಿವರ ಹೇಳಿಕೆಗಳ ಮೂಲ ಅರ್ಥವನ್ನು ಪ್ರಶ್ನಿಸಿದೆ ಎಂದು ನ್ಯಾಯಾಲಯ ಹೇಳಿದೆ.

ಉದಯನಿಧಿ ಭಾಷಣದಲ್ಲಿ ಅನೇಕ ಕಡೆ ಬಳಸಲಾದ 'ಓಳಿಪ್ಪು' ಎಂಬ ತಮಿಳು ಪದವನ್ನು ನ್ಯಾಯಾಧೀಶರು ಪರಿಶೀಲಿಸಿದ್ದು, ಇದರರ್ಥ ರದ್ದುಗೊಳಿಸು, ಸನಾತನ ಧರ್ಮವನ್ನು ರದ್ದುಗೊಳಿಸಬೇಕಾದರೆ, ಅದನ್ನು ಅನುಸರಿಸುವವರು ಅಸ್ತಿತ್ವದಲ್ಲಿರಬಾರದು ಎನ್ನುವುದನ್ನು ಅವರ ಮಾತು ಸೂಚಿಸುತ್ತದೆ ಎಂದು ನ್ಯಾಯಾಲಯ ಗಮನಿಸಿದ್ದು, ಸನಾತನ ಓಳಿಪ್ಪು ಎಂಬ ಪದ ನರಮೇಧ ಅಥವಾ ಸಾಂಸ್ಕೃತಿಕ ನಿರ್ಮೂಲನೆಯನ್ನು ಪ್ರತಿಪಾದಿಸುತ್ತದೆ ಎಂದು ಅರ್ಥೈಸಬಹುದು ಎಂದು ಅಭಿಪ್ರಾಯಪಟ್ಟಿದೆ.