ಮಹಾಬಲಿಪುರಂ: ವಿಶ್ವದ ಅತಿದೊಡ್ಡ ಏಕಶಿಲಾ ಶಿವಲಿಂಗವನ್ನು ತಮಿಳುನಾಡಿನ ಮಹಾಬಲಿಪುರಂನಿಂದ ಬಿಹಾರದ ಚಂಪಾರಣ್‌ ಪ್ರದೇಶದಲ್ಲಿರುವ ದೇವಾಲಯಕ್ಕೆ ಸಾಗಿಸುವ ಕಾರ್ಯಕ್ಕೆ ಚಾಲನೆ ನೀಡಲಾಗಿದೆ. ನವೆಂಬರ್ 21 ರಂದು ತಮಿಳುನಾಡಿನ ಮಹಾಬಲಿಪುರಂನಲ್ಲಿ ವಿಶ್ವದ ಅತಿದೊಡ್ಡ ಏಕಶಿಲಾ ಶಿವಲಿಂಗವನ್ನು ಹೊತ್ತ ಬೃಹತ್ ಟ್ರೇಲರ್‌ 25 ದಿನಗಳಲ್ಲಿ 2,100 ಕೀ.ಮೀ ಪ್ರಯಾಣಿಸಿ ಪೂರ್ವ ಚಂಪಾರಣ್‌ ಅನ್ನು ತಲುಪಲಿದೆ. 33 ಅಡಿ ಎತ್ತರ ಮತ್ತು 210 ಮೆಟ್ರಿಕ್ ಟನ್ ತೂಕದ ಈ ಗ್ರಾನೈಟ್ ಶಿಲ್ಪವನ್ನು ಬಿಹಾರದ ಪೂರ್ವ ಚಂಪಾರಣ್‌ನಲ್ಲಿ ನಿರ್ಮಾಣವಾಗುತ್ತಿರುವ ವಿರಾಟ್ ರಾಮಾಯಣ ಮಂದಿರದಲ್ಲಿ ಸ್ಥಾಪಿಸಲಾಗುತ್ತಿದೆ. ದೆಹಲಿ ಮೂಲದ ಕ್ರಿಸ್ ಮತ್ತು ವಿ ಸಂಸ್ಥೆಯು ಈ ಯೋಜನೆಯ ಉಸ್ತುವಾರಿ ವಹಿಸಿದ್ದು, ಕಲಾತ್ಮಕ ಕರಕುಶಲತೆ ಮತ್ತು ಅತ್ಯಾಧುನಿಕ ಎಂಜಿನಿಯರಿಂಗ್‌ನ ಸಂಯೋಜನೆಯಾಗಿದೆ. ತಿರುನೆಲ್ವೇಲಿ ಜಿಲ್ಲೆಯಿಂದ ಸುಮಾರು 300 ಟನ್ ಕಚ್ಚಾ ತೂಕದ 'ವಜ್ರದ ಗ್ರಾನೈಟ್' ಬ್ಲಾಕ್ ಅನ್ನು ಆಯ್ಕೆ ಮಾಡಿ, ಮೂರು ವರ್ಷಗಳ ಕೆತ್ತನೆಗಾಗಿ ಪಟ್ಟಿಕ್ಕಾಡಿಗೆ ಸಾಗಿಸಲಾಗಿತ್ತು. ಈ ಕಾರ್ಯವನ್ನು 73 ವರ್ಷದ ಹೇಮಲತಾ ಮತ್ತು ಹಿರಿಯ ಶಿಲ್ಪಿ ಲೋಕನಾಥ್ ಅವರು 24 ಸದಸ್ಯರ ತಂಡದೊಂದಿಗೆ ಮುನ್ನಡೆಸಿದರು.

ಶಿವಲಿಂಗವು ಮೂರು ಸಾಂಪ್ರದಾಯಿಕ ಭಾಗಗಳನ್ನು ಹೊಂದಿದೆ. ಚೌಕಾಕಾರದ ಬ್ರಹ್ಮ-ಪೀಠ, ಅಷ್ಟಭುಜಾಕೃತಿಯ ವಿಷ್ಣು-ಪೀಠ ಮತ್ತು ದುಂಡಗಿನ ಶಿವ-ಪೀಠ. ಇದರ ವಿಶಿಷ್ಟತೆಯೆಂದರೆ, ತಳದಲ್ಲಿ ಕೆತ್ತಲಾಗಿರುವ 1,008 ಪುಟ್ಟ ಶಿವಲಿಂಗಗಳು. ಮೂರು ವರ್ಷಗಳ ಕೆತ್ತನೆಯ ನಂತರ, ಈ ಶಿವಲಿಂಗವನ್ನು ಅಂತಿಮವಾಗಿ ಬಿಹಾರದ ಪೂರ್ವ ಚಂಪಾರಣ್‌ಗೆ ರವಾನಿಸಲಾಗುತ್ತಿದೆ. ಇದು 2026 ರ ಆರಂಭದ ವೇಳೆಗೆ ಪಾಟ್ನಾದಿಂದ 120 ಕಿ.ಮೀ ದೂರದಲ್ಲಿರುವ ಚಕಿಯಾ ತಲುಪುವ ನಿರೀಕ್ಷೆಯಿದೆ, ಅಲ್ಲಿ ಇದನ್ನು ವಿರಾಟ್ ರಾಮಾಯಣ ಮಂದಿರದಲ್ಲಿ ಸ್ಥಾಪಿಸಲಾಗುವುದು. ಶಿವಲಿಂಗದ ನಿರ್ಮಾಣಕ್ಕೆ ಸುಮಾರು 3 ಕೋಟಿ ರೂಪಾಯಿ ವೆಚ್ಚವಾಗಿದೆ ಎಂದು ವರದಿಯಾಗಿದೆ. ಮಹಾಬಲಿಪುರಂನಿಂದ ಬಿಹಾರದ ಚಕಿಯಾಗೆ 25 ದಿನಗಳ, 2,100 ಕಿ.ಮೀ. ದೂರದ ಸವಾಲಿನ ಪ್ರಯಾಣವನ್ನು ಬೆಂಗಳೂರಿನ ವಿದುರಾ ಲಾಜಿಸ್ಟಿಕ್ಸ್ ಕೈಗೆತ್ತಿಕೊಂಡಿದೆ. 210 ಟನ್ ತೂಕವು (ಸಂಪೂರ್ಣ ತುಂಬಿದ ಬೋಯಿಂಗ್ 767 ವಿಮಾನಕ್ಕೆ ಸಮಾನ) ಸಾಮಾನ್ಯ ಸಾರಿಗೆಯಲ್ಲ. ಹೀಗಾಗಿ, ಕಂಪನಿಯು 96-ಚಕ್ರಗಳ ಹೈಡ್ರಾಲಿಕ್ ಟ್ರೇಲರ್ ಅನ್ನು ಬಳಸಿದೆ. ಟ್ರೇಲರ್‌ನ ವಿಶೇಷತೆಗಳು ಇಂತಿವೆ.