ಹೊಸದಿಲ್ಲಿ: ಆಪರೇಷನ್‌ ಸಿಂಧೂರ್‌ ಕಾರ್ಯಾಚರಣೆಯ ವೇಳೆ ಭಾರತದಿಂದ ಹೊಡೆತ ತಿಂದು ಯುದ್ದ ನಿಲ್ಲಿಸುವಂತೆ ಅಂಗಲಾಚಿದ್ದ ಪಾಕಿಸ್ತಾನ ಇದೀಗ ತನ್ನ ಬೆಂಬಲಕ್ಕೆ ಇತರ ದೇಶಗಳ ನೆರವು ಪಡೆಯಲು ಹೊರಟಿರುವ ಸಂಗತಿ ಬಯಲಾಗಿದೆ. ಒಂದು ವೇಳೆ, ಭಾರತವು ಪಾಕಿಸ್ತಾನದ ಮೇಲೆ ಯುದ್ಧ ಘೋಷಿಸಿದರೆ, ಸೌದಿ ಅರೇಬಿಯಾ ಪಾಕಿಸ್ತಾನವನ್ನು ರಕ್ಷಿಸುತ್ತದೆ ಎಂದು ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಹೇಳಿಕೊಂಡಿದ್ದಾರೆ. ಇಸ್ಲಾಮಾಬಾದ್‌ನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಖವಾಜಾ ಆಸಿಫ್, ಭಾರತವು ಪಾಕಿಸ್ತಾನದ ಮೇಲೆ ಯುದ್ಧ ಘೋಷಿಸಿದರೆ, ಸೌದಿ ಅರೇಬಿಯಾ ಪಾಕಿಸ್ತಾನವನ್ನು ರಕ್ಷಿಸುತ್ತದೆ ಎಂಬ ಭರವಸೆ ಇದೆ. ಈ ವಾರ ಸೌದಿ ಅರೇಬಿಯಾ ಮತ್ತು ಪಾಕಿಸ್ತಾನದ ನಡುವೆ ಸಹಿ ಮಾಡಲಾದ 'ಕಾರ್ಯತಂತ್ರದ ಪರಸ್ಪರ ನೆರವು' ಒಪ್ಪಂದದ ಭಾಗವಾಗಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಹೇಳಿದ್ದಾರೆ. ಒಂದು ವೇಳೆ ಭಾರತ ಯುದ್ಧ ಘೋಷಿಸಿದರೆ, ನಿಸ್ಸಂದೇಹವಾಗಿ ಸೌದಿ ಅರೇಬಿಯಾ ನಮ್ಮ ಬೆಂಬಲಕ್ಕೆ ನಿಲ್ಲಲಿದೆ ಎಂದು ದೃಢ ವಿಶ್ವಾಸ ವ್ಯಕಪಡಿಸಿರುವ ಆಸಿಫ್, ಈ ಒಪ್ಪಂದವನ್ನು ನ್ಯಾಟೋ ಒಪ್ಪಂದದ 5 ನೇ ವಿಧಿಗೆ ಹೋಲಿಸಿದ್ದಾರೆ. ನ್ಯಾಟೋ ಒಪ್ಪಂದದ 5 ನೇ ವಿಧಿಯು 'ಸಾಮೂಹಿಕ ರಕ್ಷಣೆ'ಯನ್ನು ಸೂಚಿಸುತ್ತದೆ, ಅಂದರೆ ಒಂದು ಸದಸ್ಯ ರಾಷ್ಟ್ರದ ಮೇಲೆ ಮಿಲಿಟರಿ ದಾಳಿಯಾದರೆ ಅದನ್ನು ಎಲ್ಲಾ ಸದಸ್ಯ ರಾಷ್ಟ್ರಗಳ ಮೇಲಿನ ದಾಳಿ ಎಂದು ಪರಿಗಣಿಸಲಾಗುತ್ತದೆ. ಆದಾಗ್ಯೂ, ಸೌದಿ ಅರೇಬಿಯಾದೊಂದಿಗಿನ ಈ ಒಪ್ಪಂದವು 'ಆಕ್ರಮಣಕಾರಿ'ಯ ಬದಲಾಗಿ 'ರಕ್ಷಣಾತ್ಮಕ' ಒಪ್ಪಂದವಾಗಿದೆ. "ಈ ಒಪ್ಪಂದವನ್ನು ಯಾವುದೇ ಆಕ್ರಮಣಕ್ಕಾಗಿ ಬಳಸುವ ಉದ್ದೇಶ ನಮಗಿಲ್ಲ," ಆದರೆ, "ಸೌದಿ ಅರೇಬಿಯಾ ಅಥವಾ ಪಾಕಿಸ್ತಾನದ ಮೇಲೆ ಆಕ್ರಮಣವಾದರೆ, ನಾವು ಅದನ್ನು ಜಂಟಿಯಾಗಿ ರಕ್ಷಿಸುತ್ತೇವೆ," ಎಂದು ಹೇಳಿದ್ದಾರೆ.

ಪಾಕಿಸ್ತಾನದ ಪ್ರಧಾನಿ ಶಹಬಾಜ್ ಷರೀಫ್ ಅವರು ಇತ್ತೀಚೆಗೆ ರಿಯಾದ್‌ಗೆ ಭೇಟಿ ನೀಡಿದಾಗ 'ಪರಸ್ಪರ ರಕ್ಷಣಾ' ಒಪ್ಪಂದಕ್ಕೆ ಸಹಿ ಹಾಕಲಾಗಿತ್ತು. ಈ ಒಪ್ಪಂದದ ಪ್ರಮುಖ ಷರತ್ತು "ಎರಡೂ ದೇಶಗಳ ವಿರುದ್ಧದ ಯಾವುದೇ ಆಕ್ರಮಣವನ್ನು ಇಬ್ಬರ ವಿರುದ್ಧದ ಆಕ್ರಮಣವೆಂದು ಪರಿಗಣಿಸಲಾಗುತ್ತದೆ" ಎಂದು ಹೇಳುತ್ತದೆ. ಭಾರತ ಸರ್ಕಾರವು ಈ ಒಪ್ಪಂದವನ್ನು ಈಗಾಗಲೇ ಇರುವ ವ್ಯವಸ್ಥೆಯ ಔಪಚಾರಿಕೀಕರಣ ಎಂದು ಪರಿಗಣಿಸಿದೆ ಮತ್ತು ಅದರ ಪರಿಣಾಮಗಳ ಬಗ್ಗೆ ಅಧ್ಯಯನ ಮಾಡುತ್ತಿದೆ. ಈ ಒಪ್ಪಂದವು ಇಸ್ರೇಲ್ ಮತ್ತು ಇರಾನ್ ಸೇರಿದಂತೆ ಪ್ರಾದೇಶಿಕ ರಾಷ್ಟ್ರಗಳ ಗಮನವನ್ನು ಸೆಳೆದಿದೆ. ಏಕೆಂದರೆ, ಈ ಒಪ್ಪಂದ ಸೌದಿ ಅರೇಬಿಯಾಕ್ಕೆ 'ಪರಮಾಣು ರಕ್ಷಣೆ'ಯನ್ನು ನೀಡುತ್ತದೆ. ಹೀಗಾಗಿ ಪರಮಾಣು ಶಸ್ತ್ರಾಸ್ತ್ರಗಳಿಗೆ ಪ್ರವೇಶ ಹೊಂದಿರುವ ಏಕೈಕ ಪಶ್ಚಿಮ ಏಷ್ಯಾದ ರಾಷ್ಟ್ರವಾದ ಇಸ್ರೇಲ್ ಕೂಡ ಈ ಬೆಳವಣಿಗೆಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದೆ. ಪಾಕಿಸ್ತಾನದ ಪರಮಾಣು ಶಸ್ತ್ರಾಸ್ತ್ರಗಳು ಸೌದಿ ಅರೇಬಿಯಾದ ಬಳಕೆಗೆ ಲಭ್ಯವಿದೆ ಎಂದು ಆಸಿಫ್ ಖಚಿತಪಡಿಸಿದ್ದಾರೆ. ಪಾಕಿಸ್ತಾನದ ಘೋಷಿತ ಸಿದ್ಧಾಂತವು ಈ ಶಸ್ತ್ರಾಸ್ತ್ರಗಳನ್ನು ಭಾರತದ ವಿರುದ್ಧ ಮಾತ್ರ ಬಳಸಲು ಉದ್ದೇಶಿಸಿದೆ ಎಂದು ಹೇಳುತ್ತದೆ. "ಈ ಒಪ್ಪಂದದ ಅಡಿಯಲ್ಲಿ ನಮ್ಮ ಪರಮಾಣು ಸಾಮರ್ಥ್ಯಗಳು ಖಂಡಿತವಾಗಿಯೂ ಸೌದಿ ಅರೇಬಿಯಕ್ಕೆ ಲಭ್ಯವಿರುತ್ತವೆ. ಪಾಕಿಸ್ತಾನವು ಯಾವಾಗಲೂ ತನ್ನ ಪರಮಾಣು ಸೌಲಭ್ಯಗಳ ತಪಾಸಣೆಗೆ ಅವಕಾಶ ನೀಡಿದೆ ಮತ್ತು ಯಾವುದೇ ಉಲ್ಲಂಘನೆಗಳನ್ನು ಮಾಡಿಲ್ಲ" ಎಂದು ಅವರು ಹೇಳಿದ್ದಾರೆ.