ಹೊಸದಿಲ್ಲಿ: ಜಮ್ಮು ಕಾಶ್ಮೀರದ ಪಹಲ್ಗಾಮ್‌ ನಲ್ಲಿ ನಡೆದ ಉಗ್ರ ದಾಳಿಗೆ ಪ್ರತೀಕಾರವಾಗಿ ಭಾರತೀಯ ಸೇನೆ ನಡೆಸಿದ ಆಪರೇಷನ್‌ ಸಿಂದೂರ್‌ ಎಲ್ಲರೂ ತಿಳಿದಂತೆ ಮೂರು ದಿನಕ್ಕೆ ಅಂತ್ಯಗೊಂಡಿಲ್ಲ; ದೀರ್ಘಕಾಲದವರೆಗೆ ಮುಂದುವರೆಯಿತು ಎಂದು ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ ಹೇಳಿದ್ದಾರೆ. "ಮೇ 10 ರಂದು ಯುದ್ಧ ಕೊನೆಗೊಂಡಿತು ಎಂದು ನೀವು ತಿಳಿದಿರಬಹುದು, ಆದರೆ ಇಲ್ಲ. ಅದು ದೀರ್ಘಕಾಲ ಮುಂದುವರಿಯಿತು. ಏಕೆಂದರೆ ಹಲವು ನಿರ್ಧಾರಗಳನ್ನು ತೆಗೆದುಕೊಳ್ಳಬೇಕಾಗಿತ್ತು, ಮತ್ತು ಅದನ್ನು ಮೀರಿ, ಇಲ್ಲಿ ಎಲ್ಲವನ್ನೂ ಹಂಚಿಕೊಳ್ಳಲು ನನಗೆ ಕಷ್ಟವಾಗುತ್ತದೆ" ಎಂದು ಅವರು ಶುಕ್ರವಾರ (ಸೆ.05) ನವದೆಹಲಿಯಲ್ಲಿ ನಡೆದ ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಹೇಳಿದರು. ಭಾರತ ಮತ್ತು ಪಾಕಿಸ್ತಾನ ಗಡಿಯ ಮುಂದುವರಿದ ಪರಿಸ್ಥಿತಿಯ ಬಗ್ಗೆ ಮಾತನಾಡಿದ ಅವರು, ಆಪರೇಷನ್‌ ಸಿಂದೂರ್‌ ನ ಪರಿಣಾಮದ ಬಗ್ಗೆ ಈಗಲೇ ಹೇಳುವುದು ಕಷ್ಟ. ಪಾಕಿಸ್ತಾನ ಬೆಂಬಲಿತ ಉಗ್ರಗಾಮಿ ಚಟುವಟಿಕೆಗಳು ಇನ್ನೂ ನಿಂತಿಲ್ಲ, ಗಡಿ ಭಾಗದಲ್ಲಿ ಒಳನುಸುಳುವ ಪ್ರಯತ್ನಗಳು ನಡೆಯುತ್ತಲೇ ಇದೆ ಎಂದರು.

"ಎಲ್‌ಒಸಿ ಪರಿಸ್ಥಿತಿಯ ಮೇಲೆ ಆಪರೇಷನ್ ಸಿಂದೂರ್‌ನ ಪರಿಣಾಮದ ಬಗ್ಗೆ ಮಾತನಾಡುವುದು ತೀರಾ ಬೇಗವಾದೀತು, ಏಕೆಂದರೆ ಅದು ಕೊನೆಗೊಂಡು ಹೆಚ್ಚು ಸಮಯವಾಗಿಲ್ಲ. ಪ್ರಾಯೋಜಿತ ಭಯೋತ್ಪಾದನೆ ಕೊನೆಗೊಂಡಿದೆಯೇ? ನಾನು ಹಾಗೆ ಭಾವಿಸುವುದಿಲ್ಲ, ಏಕೆಂದರೆ ಎಲ್‌ಒಸಿಯಲ್ಲಿ ಒಳನುಸುಳುವಿಕೆ ಪ್ರಯತ್ನಗಳು ಇನ್ನೂ ನಡೆಯುತ್ತಿವೆ. ಎಷ್ಟು ಭಯೋತ್ಪಾದಕರು ಕೊಲ್ಲಲ್ಪಟ್ಟಿದ್ದಾರೆ ಮತ್ತು ಅವರಲ್ಲಿ ಎಷ್ಟು ಮಂದಿ ತಪ್ಪಿಸಿಕೊಂಡಿದ್ದಾರೆ ಎಂಬುದು ನಮಗೆಲ್ಲರಿಗೂ ತಿಳಿದಿದೆ" ಎಂದು ಜನರಲ್ ದ್ವಿವೇದಿ ಹೇಳಿದರು. ಕಾರ್ಯಾಚರಣೆಯ ಸಮಯದಲ್ಲಿ ಸಶಸ್ತ್ರ ಪಡೆಗಳಲ್ಲಿ ಸಮನ್ವಯದ ಮಹತ್ವವನ್ನು ಸೇನಾ ಮುಖ್ಯಸ್ಥರು ಒತ್ತಿ ಹೇಳಿದರು, ಭಾರತೀಯ ಸೇನೆಯ ಸಂಘಟಿತ ಚಲನೆಗಳನ್ನು ಪ್ರತಿಯೊಬ್ಬರೂ ಸಿಂಕ್‌ನಲ್ಲಿದ್ದ ಮತ್ತು ಅವರ ಆದೇಶಗಳ ಬಗ್ಗೆ ಸಂಪೂರ್ಣವಾಗಿ ತಿಳಿದಿದ್ದರು ಎಂದರು.