ವಾಷಿಂಗ್ಟನ್‌ ಡಿಸಿ: ಅಮೆರಿಕದ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ (ಎನ್‌ಎಸ್‌ಎ) ಮತ್ತು ವಕೀಲ ಜೇಕ್ ಸುಲ್ಲಿವನ್ ಅವರು, ಭಾರತವನ್ನು ದೂರ ತಳ್ಳುತ್ತಿರುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಸಂದರ್ಶನವೊಂದರಲ್ಲಿ ಸುಲ್ಲಿವನ್‌ ಅವರು, ಪಾಕಿಸ್ತಾನದಲ್ಲಿ ಟ್ರಂಪ್‌ ಕುಟುಂಬದ ವಾಣಿಜ್ಯ ಹಿತಾಸಕ್ತಿಗಳ ರಹಸ್ಯವನ್ನು ಬಿಚ್ಚಿಟ್ಟಿದ್ದಾರೆ. ಅಮೆರಿಕದ ಮಾಜಿ ಎನ್‌ಎಸ್‌ಎ ಜೇಕ್‌ ಸುಲ್ಲಿವನ್‌, "ಪಾಕಿಸ್ತಾನದಲ್ಲಿ ಟ್ರಂಪ್‌ ಕುಟುಂಬದ ವ್ಯಾಪಾರ ಸಂಬಂಧಗಳಿದ್ದು, ತಮ್ಮ ಕುಟುಂಬದ ವಾಣಿಜ್ಯ ಹಿತಾಸಕ್ತಿಗಳನ್ನು ಕಾಪಾಡಲು ಡೊನಾಲ್ಡ್‌ ಟ್ರಂಪ್‌ ಭಾರತವನ್ನು ದೂರ ತಳ್ಳುತ್ತಿದ್ದಾರೆ" ಎಂದು ಗಂಭೀರ ಆರೋಪ ಮಾಡಿದ್ದಾರೆ. "ಡೊನಾಲ್ಡ್‌ ಟ್ರಂಪ್‌ ಪಾಕಿಸ್ತಾನದಲ್ಲಿ ತಮ್ಮ ಕುಟುಂಬದ ವಾಣಿಜ್ಯ ಹಿತಾಸಕ್ತಿಗಳನ್ನು ಕಾಪಾಡಲು, ಭಾರತದಿಂದ ದೂರ ಸರಿಯುತ್ತಿದ್ದಾರೆ. ಭಾರತದೊಂದಿಗಿನ ಪ್ರಸ್ತುತ ಸುಂಕ ಸಮರ ಟ್ರಂಪ್‌ ಅವರ ವೈಯಕ್ತಿಕ ಹಿತಾಸಕ್ತಿಗಳನ್ನು ಕೇಂದ್ರೀಕರಿಸಿದೆಯೇ ಹೊರತು, ಇದಕ್ಕೂ ಅಮೆರಿಕದ ಸಾಮಾನ್ಯ ನಾಗರಿಕರಿಗೂ ಯಾವುದೇ ಸಂಬಂಧವಿಲ್ಲ" ಎಂದು ಜೇಕ್‌ ಸುಲ್ಲಿವನ್‌ ಸ್ಪಷ್ಟಪಡಿಸಿದ್ದಾರೆ. "ಭಾರತದೊಂದಿಗಿನ ಸಂಬಂಧವನ್ನು ತ್ಯಾಗ ಮಾಡುವ ಕ್ರಮವ ಅಮೆರಿಕದ ಕಾರ್ಯತಂತ್ರಕ್ಕೆ ಮಾಡಿರುವ ದೊಡ್ಡ ಹಾನಿ" ಎಂದು ಆಪಾದಿಸಿರುವ ಜೇಕ್‌ ಸುಲ್ಲಿವನ್‌, ಡೊನಾಲ್ಡ್‌ ಟ್ರಂಪ್‌ ಅವರು ಪಾಕಿಸ್ತಾನದೊಂದಿಗೆ ತಮ್ಮ ಕುಟುಂಬ ಹೊಂದಿರುವ ವ್ಯಾಪಾರ ಸಂಬಂಧಕ್ಕಾಗಿ ಅಮೆರಿಕದ ರಾಷ್ಟ್ರೀಯ ಹಿತಾಸಕ್ತಿಯನ್ನು ಬಲಿ ಕೊಡುತ್ತಿದ್ದಾರೆ ಎಂದು ತೀವ್ರ ಅಸಮಧಾನ ಹೊರಹಾಕಿದ್ದಾರೆ. ಯುಟ್ಯೂಬ್‌ ಸಂದರ್ಶನದಲ್ಲಿ ಪಾಕಿಸ್ತಾನದೊಂದಿಗೆ ಟ್ರಂಪ್ ಕುಟುಂಬದ ಬಿಟ್‌ಕಾಯಿನ್ ವ್ಯವಹಾರವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟ ಜೇಕ್‌ ಸುಲ್ಲಿವನ್‌, ಟ್ರಂಪ್‌ ತಮ್ಮ ಕುಟುಂಬದ ವಾಣಿಜ್ಯ ಹಿತಾಸಕ್ತಿಗಾಗಿ ಅಮೆರಿಕದ ವಿದೇಶಾಂಗ ನೀತಿಯನ್ನು ತಿರುಚುತ್ತಿದ್ದಾರೆ ಎಂದು ಗಂಭೀರ ಆರೋಪ ಮಾಡಿದ್ದಾರೆ. ಇತ್ತೀಚಿಗೆ ನಿಕ್ಕಿ ಹ್ಯಾಲಿ ಅವರು ಭಾರತ-ಅಮೆರಿಕ ಸಂಬಂಧ ಮುರಿಯುವ ಹಂತ ತಲುಪಿದೆ ಎಂದು ಎಚ್ಚರಿಸಿದ್ದರು. "ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವ ದೇಶವಾದ ಭಾರತದೊಂದಿಗೆ, ದ್ವಿಪಕ್ಷೀಯ ಆಧಾರದ ಮೇಲೆ ತನ್ನ ಸಂಬಂಧವನ್ನು ನಿರ್ಮಿಸಲು ಅಮೆರಿಕ ದಶಕಗಳಿಂದ ಕೆಲಸ ಮಾಡಿದೆ. ತಂತ್ರಜ್ಞಾನ, ಪ್ರತಿಭೆ, ಆರ್ಥಿಕತೆ ಮತ್ತು ಇತರ ಹಲವಾರು ವಿಷಯಗಳಲ್ಲಿ, ಅಮೆರಿಕವು ಹೊಂದಿರಲೇಬೇಕಾದ ಆಪ್ತಮಿತ್ರ ದೇಶ ಭಾರತ. ಅಷ್ಟೇ ಅಲ್ಲದೇ ಚೀನಾದಿಂದ ಬರುವ ಕಾರ್ಯತಂತ್ರದ ಬೆದರಿಕೆಯನ್ನು ಎದುರಿಸುವಲ್ಲಿಯೂ ನಮಗೆ ಭಾರತ ಬೇಕಾಗುತ್ತದೆ. ಆದರೆ ಟ್ರಂಪ್‌ ತಮ್ಮ ಕುಟುಂಬದ ಲಾಭಕ್ಕಾಗಿ ಭಾರತವನ್ನು ದೂರ ತಳ್ಳಿದ್ದಾರೆ" ಎಂದು ಅಮೆರಿಕದ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. 

ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಕುಟುಂಬ ಮತ್ತು ಪಾಕಿಸ್ತಾನದ ಭೂಸೇನಾ ಅಧ್ಯಕ್ಷ ಫೀಲ್ಡ್‌ ಮಾರ್ಷಲ್‌ ಅಸಿಮ್‌ ಮುನೀರ್‌ ನಡುವೆ ಬಿಟ್‌ಕಾಯಿನ್‌ ವ್ಯಾಪಾರ ಸಂಬಂಧವಿದೆ ಎಂಬ ಆರೋಪ ಈ ಹಿಂದೆಯೇ ಕೇಳಿಬಂದಿತ್ತು. ಅಸಿಮ್ ಮುನೀರ್‌ ಅವರ ಪದೇ ಪದೇ ಅಮೆರಿಕ ಭೇಟಿ‌ ಮತ್ತು ಮುನೀರ್‌ ಅವರನ್ನು ಹಾಡಿ ಹೊಗಳುವ ಟ್ರಂಪ್‌ ಅವರ ನಡೆ ಅನುಮಾನಕ್ಕೆ ಕಾರಣವಾಗಿತ್ತು. ಅಮೆರಿಕ ಭೂಗ್ರಹದ ಕ್ರಿಪ್ಟೋ ರಾಜಧಾನಿ ಎಂದು ಘೋಷಿಸಿರುವ ಡೊನಾಲ್ಡ್‌ ಟ್ರಂಪ್‌, ಇದರಲ್ಲಿ ತಮ್ಮ ಕುಟುಂಬದ ವ್ಯಾಪಾರ ಇದೆ ಎಂಬ ಸತ್ಯವನ್ನು ಅತ್ಯಂತ ಜಾಣತನದಿಂದ ಮರೆಮಾಚಿದ್ದಾರೆ.