ನವದೆಹಲಿ: ವಾಣಿಜ್ಯ ಬಳಕೆಗಾಗಿ ಇರುವ 19 ಕೆಜಿ ತೂಕದ ಲಿಕ್ವಿಫೈಡ್​ ಪೆಟ್ರೋಲಿಯಂ ಗ್ಯಾಸ್ ​(LPG) ಸಿಲಿಂಡರ್​ಗಳ ಬೆಲೆಯನ್ನು ತೈಲ ಮಾರುಕಟ್ಟೆ ಕಂಪನಿಗಳು 51.50 ರೂ.ನಷ್ಟು ಇಳಿಸಿದೆ. ಇಂದು ಇಂದಿನಿಂದ ಅಂದರೆ ಸೆ.1ರಿಂದಲೇ ಜಾರಿಗೆ ಬಂದಿದೆ. ಆದರೆ, 14.2ಕೆಜಿ ತೂಕದ ಗೃಹ ಬಳಕೆಯ ಸಿಲಿಂಡರ್​ಗಳ ಬೆಲೆಯಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ. ಪ್ರಮುಖ ನಗರಗಳಲ್ಲಿನ ವಾಣಿಜ್ಯ ಸಿಲಿಂಡರ್​ಗಳ ಹೊಸ ದರಗಳು ಹೀಗಿವೆ: ದೆಹಲಿಯಲ್ಲಿ19 ಕೆಜಿ ತೂಕದ LPG ಸಿಲಿಂಡರ್​ನ ಚಿಲ್ಲರೆ ಮಾರಾಟ ಬೆಲೆ ಮೊದಲು 1,631.50 ಇತ್ತು, ಈಗ 1,580 ರೂಗೆ ಇಳಿಕೆಯಾಗಿದೆ. ಹಾಗೇ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಪ್ರಕಾರ, ಕೋಲ್ಕತ್ತಾದಲ್ಲಿ LPG ಸಿಲಿಂಡರ್​ನ ಬೆಲೆ ಸದ್ಯ ಬದಲಾವಣೆ ನಂತರ ₹1,684, ಮುಂಬೈನಲ್ಲಿ ₹1,531.50, ಮತ್ತು ಚೆನ್ನೈನಲ್ಲಿ ₹1,738 ಕ್ಕೆ ಪರಿಷ್ಕರಿಸಲಾಗಿದೆ. ಗೃಹ ಬಳಕೆಯ ಸಿಲಿಂಡರ್​ಗಳ ಬೆಲೆಯಲ್ಲಿ ಬದಲಾವಣೆಯಿಲ್ಲ: ಏಪ್ರಿಲ್​ 8ರಿಂದ 14.2ಕೆಜಿ ಗೃಹ ಬಳಕೆಯ ಸಿಲಿಂಡರ್‌ಗಳ ಬೆಲೆ ಸ್ಥಿರವಾಗಿದೆ. ಇಂಡಿಯನ್ ಆಯಿಲ್ ಕಾರ್ಪೊರೇಷನ್‌ನ ಮಾಹಿತಿ ಪ್ರಕಾರ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಒಂದು ಸಿಲಿಂಡರ್‌ಗೆ ₹853, ಚೆನ್ನೈನಲ್ಲಿ ₹868.50, ಕೋಲ್ಕತ್ತಾದಲ್ಲಿ ₹879 ಮತ್ತು ಮುಂಬೈನಲ್ಲಿ ₹852.50 ದರ ಮುಂದುವರಿದಿದೆ. ವಾಣಿಜ್ಯ ಬಳಕೆಗಾಗಿ ಇರುವ 19 ಕೆಜಿ ತೂಕದ ಲಿಕ್ವಿಫೈಡ್​ ಪೆಟ್ರೋಲಿಯಂ ಗ್ಯಾಸ್ ​(LPG) ಸಿಲಿಂಡರ್​ಗಳ ಬೆಲೆ ಇಳಿಕೆಯು ದೈನಂದಿನ ಕೆಲಸಕ್ಕಾಗಿ ಈ ಸಿಲಿಂಡರ್‌ಗಳನ್ನು ಅವಲಂಬಿಸಿರುವ ಸಣ್ಣ ಅಂಗಡಿಗಳು, ಹೋಟೆಲ್‌ಗಳು ಮತ್ತು ಆಹಾರ ವ್ಯಾಪಾರಗಳಂತಹ ಸಣ್ಣ ಉದ್ಯಮಗಳಿಗೆ ಬಹಳ ಪ್ರಯೋಜನಕಾರಿಯಾಗಲಿದೆ. ಕೇಂದ್ರ ಸರ್ಕಾರದ ಈ ನಿರ್ಧಾರದಿಂದಾಗಿ ದೇಶದಲ್ಲಿ ಎಲ್‌ಪಿಜಿ ಬೆಲೆಗಳನ್ನು ಸ್ಥಿರವಾಗಿಡಲು ಸಾಧ್ಯವಾಗಿದೆ ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವ ಹರ್ದೀಪ್ ಸಿಂಗ್ ಪುರಿ ಆಗಸ್ಟ್‌ನಲ್ಲಿ ತಿಳಿಸಿದ್ದರು. ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದ ಕೇಂದ್ರ ಸಂಪುಟವು, ಆಗಸ್ಟ್ 8 ರಂದು ಜಾಗತಿಕ ಅನಿಶ್ಚಿತತೆಯ ನಡುವೆಯೂ ಎಲ್‌ಪಿಜಿ ಬೆಲೆಗಳನ್ನು ಸ್ಥಿರವಾಗಿ ಇರಿಸಿದ ತೈಲ ಕಂಪನಿಗಳಿಗೆ ₹30,000 ಕೋಟಿ ಪರಿಹಾರವನ್ನು ಹನ್ನೆರಡು ಭಾಗಗಳಲ್ಲಿ ಪಾವತಿಸಲು ಅನುಮೋದನೆ ನೀಡಿದೆ. ಕಳೆದ ತಿಂಗಳು ಏಪ್ರಿಲ್​ನಲ್ಲಿ ಅಡುಗೆ ಅನಿಲ ಅಥವಾ ದೇಶೀಯ ಎಲ್​ಪಿಜಿ ಸಿಲಿಂಡರ್ ಬೆಲೆಯನ್ನು ಪ್ರತಿ ಸಿಲಿಂಡರ್​ಗೆ 50 ರೂ.ಗಳಷ್ಟು ಹೆಚ್ಚಿಸಲಾಗಿತ್ತು. ಈ ಬಗ್ಗೆ ಕೇಂದ್ರ ತೈಲ ಇಲಾಖೆ ಸಚಿವ ಹರ್ ದೀಪ್ ಸಿಂಗ್ ಪುರಿ ಅಧಿಕೃತವಾಗಿ ತಿಳಿಸಿದ್ದರು. ಸಬ್ಸಿಡಿ ಮತ್ತು ಸಾಮಾನ್ಯ ವರ್ಗದ ಎಲ್ಲಾ ಗ್ರಾಹಕರಿಗೆ ಬೆಲೆಯನ್ನು ಹೆಚ್ಚಿಸಲಾಗಿತ್ತು. 14.2 ಕೆಜಿ ಎಲ್​ಪಿಜಿಯ ಬೆಲೆ ಉಜ್ವಲಾ ಅಡಿ 500 ರಿಂದ 550ಕ್ಕೆ ಮತ್ತು ಉಜ್ವಲಾ ಅಲ್ಲದ ಬಳಕೆದಾರರಿಗೆ 803 ರಿಂದ 853 ರೂಪಾಯಿಗೆ ಏರಿಕೆ ಮಾಡಲಾಗಿತ್ತು.