ನವದೆಹಲಿ : ನವದೆಹಲಿಯ ಭಾರತ ಮಂಟಪದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಬ್ರಿಕ್ಸ್ (BRICS) ಶೃಂಗಸಭೆಯ ನಾಯಕರು ಹಾಗೂ ವಿದೇಶಿ ಪ್ರತಿನಿಧಿಗಳಿಗಾಗಿ ಆಯೋಜಿಸಿದ್ದ ಔತಣಕೂಟದಲ್ಲಿ ಬಡಿಸಲಾದ ಸಂಪೂರ್ಣ ಸಸ್ಯಾಹಾರಿ ಭೋಜನದ ಮೆನು ಇದೀಗ ತೀವ್ರ ರಾಜಕೀಯ ವಾಕ್ಸಮರಕ್ಕೆ ಕಾರಣವಾಗಿದೆ. ಔತಣಕೂಟದಲ್ಲಿ ಸಂಪೂರ್ಣ ಸಸ್ಯಾಹಾರಿ ಆಹಾರ ನೀಡಿದ್ದಕ್ಕಾಗಿ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಸರ್ಕಾರದ ವಿರುದ್ಧ ಪರೋಕ್ಷವಾಗಿ ವಾಗ್ದಾಳಿ ನಡೆಸಿದ್ದರೆ, ಕೇಂದ್ರ ಸಚಿವ ಕಿರಣ್ ರಿಜಿಜು ತೀಕ್ಷ್ಣವಾಗಿ ತಿರುಗೇಟು ನೀಡಿದ್ದಾರೆ.

ಮೈಕ್ರೋ-ಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ‘ಎಕ್ಸ್’ನಲ್ಲಿ ‘ಚೋಲೆ ಭಟೂರೆ’ಯ ಫೋಟೋವನ್ನು ಹಂಚಿಕೊಂಡ ರಾಹುಲ್ ಗಾಂಧಿ, ಭಾರತದಲ್ಲಿ ಶೇಕಡಾ 80 ರಷ್ಟು ಜನರು ಮಾಂಸಾಹಾರಿಗಳಾಗಿದ್ದು, ಭಾರತೀಯ ಮಾಂಸಾಹಾರಿ ಆಹಾರವು ಅತ್ಯಂತ ರುಚಿಕರವಾಗಿರುತ್ತದೆ ಎಂದು ಬರೆದುಕೊಳ್ಳುವ ಮೂಲಕ ಬಿಜೆಪಿಯ ನಡೆಯನ್ನು ಪರೋಕ್ಷವಾಗಿ ವಿಮರ್ಶಿಸಿದ್ದಾರೆ. ತಮ್ಮ ಸಹೋದರಿ ತಯಾರಿಸುವ ಚೋಲೆ ಭಟೂರೆಯ ಉದಾಹರಣೆ ನೀಡಿದ ಅವರು, ವಿದೇಶಿ ಪ್ರತಿನಿಧಿಗಳಿಗೆ ಬಡಿಸಲಾದ ಸಸ್ಯಾಹಾರಿ ಮೆನುವನ್ನು ಪರೋಕ್ಷವಾಗಿ ಪ್ರಶ್ನಿಸಿದ್ದಾರೆ.

ರಾಹುಲ್ ಗಾಂಧಿಯವರ ಈ ಹೇಳಿಕೆಗೆ ತಕ್ಷಣವೇ ಪ್ರತಿಕ್ರಿಯಿಸಿದ ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು, ವಿದೇಶಿ ಅತಿಥಿಗಳಿಗೆ ಬಡಿಸಿದ ಆಹಾರದ ವಿಚಾರದಲ್ಲೂ ಕಾಂಗ್ರೆಸ್ ರಾಜಕೀಯ ಮಾಡುತ್ತಿರುವುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ ಎಂದಿದ್ದಾರೆ. ನಮ್ಮ ಅತಿಥಿಗಳು ವೈವಿಧ್ಯಮಯ ಪ್ರಾದೇಶಿಕ ಸಂಪ್ರದಾಯಗಳೊಂದಿಗೆ ಸಮೃದ್ಧ ರುಚಿ ಮತ್ತು ಪೌಷ್ಟಿಕಾಂಶದ ವೈವಿಧ್ಯತೆಯನ್ನು ಹೊಂದಿರುವ ಭಾರತೀಯ ಸಸ್ಯಾಹಾರಿ ಭಕ್ಷ್ಯಗಳನ್ನು ಸವಿದು ಆನಂದಿಸಿದ್ದಾರೆ ಎಂದು ಸ್ಪಷ್ಟಪಡಿಸಿದ ರಿಜಿಜು, ಈ ವಿಷಯದಲ್ಲಿ ರಾಜಕೀಯ ಮಾಡುವುದನ್ನು ಕಾಂಗ್ರೆಸ್ ಪಕ್ಷವು ತಕ್ಷಣವೇ ನಿಲ್ಲಿಸಬೇಕೆಂದು ಸಲಹೆ ನೀಡಿದ್ದಾರೆ.

ಈ ಶೃಂಗಸಭೆಯ ಔತಣಕೂಟದಲ್ಲಿ ಆರಂಭಿಕ ತಿನಿಸುಗಳಾಗಿ ಕಡಲೆ ಹಿಟ್ಟಿನಿಂದ ಮಾಡಿದ ಆವಿಯಲ್ಲಿ ಬೇಯಿಸಿದ ರೋಲ್ ‘ಖಾಂಡ್ವಿ ಮಿಲ್’ ಮತ್ತು ಪುದೀನಾ ಪರ್ಲ್ಸ್‌ನೊಂದಿಗೆ ಪ್ಯಾನ್-ಗ್ರಿಲ್ ಮಾಡಿದ ಅಣಬೆ ಕಬಾಬ್‌ಗಳಾದ ‘ಖುಂಬ್ ಗಲೌಟಿ’ಯನ್ನು ಬಡಿಸಲಾಯಿತು. ಮುಖ್ಯ ಭಕ್ಷ್ಯಗಳಲ್ಲಿ ‘ಪನೀರ್ ಲಬಾಬ್‌ದಾರ್’, ಹಿಮಾಲಯದ ಮೊರೆಲ್ ಅಣಬೆ ಹಾಗೂ ಎಳೆಯ ಆಸ್ಪ್ಯಾರಗಸ್ ಬಳಸಿ ಸಿದ್ಧಪಡಿಸಿದ ‘ಗುಚ್ಚಿ ಮಾರ್ಮಿಕ್’ ಮತ್ತು ‘ಕ್ಯಾರೆಟ್ ಬೀನ್ ಪೊರಿಯಾಲ್’ ಸೇರಿದ್ದವು. ಇದರೊಂದಿಗೆ ತಕ್ಕಾಳಿ ಬೆಲ್ಲೆ ಸಾರು, ಸಿರಿಧಾನ್ಯದ ಪುಲಾವ್, ಬೀಟ್‌ರೂಟ್ ರಾಯ್ತಾ ಹಾಗೂ ವಿವಿಧ ಬಗೆಯ ಭಾರತೀಯ ರೊಟ್ಟಿಗಳನ್ನು ನೀಡಲಾಗಿತ್ತು. ಸಿಹಿ ತಿನಿಸುಗಳ ಪಟ್ಟಿಯಲ್ಲಿ ‘ಓಲ್ಡ್ ಡೆಲ್ಲಿ ಫ್ರೂಟ್ ಕ್ರೀಮ್ ವಿತ್ ಜಲೇಬಿ’ ಮತ್ತು ‘ಶಹತೂತ್ ಫಿರ್ನಿ’ ಸ್ಥಾನ ಪಡೆದಿದ್ದವು. ಭಾರತ ಹಾಗೂ ಬ್ರಿಕ್ಸ್ ಒಕ್ಕೂಟದ ಇತರ ಸದಸ್ಯ ರಾಷ್ಟ್ರಗಳ 100ಕ್ಕೂ ಹೆಚ್ಚು ಕಲಾವಿದರ ಸಾಂಸ್ಕೃತಿಕ ಕಾರ್ಯಕ್ರಮದೊಂದಿಗೆ ಈ ಭವ್ಯ ಔತಣಕೂಟವು ನೆರವೇರಿತು.