ಐಸ್‌ಲ್ಯಾಂಡ್ : ನವದೆಹಲಿಯಲ್ಲಿ ನಡೆದ ಬ್ರಿಕ್ಸ್ (BRICS) ಶೃಂಗಸಭೆಯ ರಾಜತಾಂತ್ರಿಕ ಔತಣಕೂಟದಲ್ಲಿ ಸಂಪೂರ್ಣ ಸಸ್ಯಾಹಾರಿ ಮೆನು ಬಡಿಸಿರುವುದಕ್ಕೆ ದೇಶದ ವಿರೋಧ ಪಕ್ಷಗಳಿಂದ ಟೀಕೆಗಳು ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ, ಐಸ್‌ಲ್ಯಾಂಡ್‌ನ ಮಾಜಿ ಅಧ್ಯಕ್ಷ ಓಲಾಫರ್ ರಾಗ್ನರ್ ಗ್ರಿಮ್ಸನ್ (Olafur Ragnar Grimsson) ಅವರು 2005ರ ಅಪರೂಪದ ಪ್ರಸಂಗವೊಂದನ್ನು ನೆನಪಿಸಿಕೊಂಡಿದ್ದಾರೆ. ಭಾರತದ ಅಂದಿನ ರಾಷ್ಟ್ರಪತಿ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಅವರು ಐಸ್‌ಲ್ಯಾಂಡ್‌ಗೆ ನೀಡಿದ್ದ ಐತಿಹಾಸಿಕ ಭೇಟಿಯ ಸಮಯದಲ್ಲಿ, ತಾವು ಕೂಡ ಸಂಪೂರ್ಣ ಸಸ್ಯಾಹಾರಿ ರಾಜತಾಂತ್ರಿಕ ಔತಣಕೂಟವನ್ನೇ ಆಯೋಜಿಸಿದ್ದಾಗಿ ಅವರು ತಿಳಿಸಿದ್ದಾರೆ.

ಈ ಕುರಿತು ಸಾಮಾಜಿಕ ಜಾಲತಾಣ 'ಎಕ್ಸ್' (X)ನಲ್ಲಿ ಬರೆದುಕೊಂಡಿರುವ ಗ್ರಿಮ್ಸನ್, "ಭಾರತದ ರಾಷ್ಟ್ರಪತಿಯವರಿಗಾಗಿ ನಾನು ಆಯೋಜಿಸಿದ್ದ ರಾಜತಾಂತ್ರಿಕ ಔತಣಕೂಟದಲ್ಲಿ ಸಂಪೂರ್ಣ ಸಸ್ಯಾಹಾರಿ ಮೆನುವನ್ನೇ ಏರ್ಪಡಿಸಿದ್ದೆ. ಅದೂ 20 ವರ್ಷಗಳಿಗಿಂತಲೂ ಹಿಂದೆ! ಸಸ್ಯಾಹಾರಿಯಾಗುವುದು ಅಷ್ಟೊಂದು ಸುಲಭವಲ್ಲದ ಐಸ್‌ಲ್ಯಾಂಡ್ ದೇಶದಲ್ಲಿ" ಎಂದು ತಮ್ಮ ನೆನಪುಗಳನ್ನು ಹಂಚಿಕೊಂಡಿದ್ದಾರೆ. 1996ರಿಂದ 2016ರವರೆಗೆ ಐಸ್‌ಲ್ಯಾಂಡ್‌ನ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದ ಗ್ರಿಮ್ಸನ್, ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಅವರು ಐಸ್‌ಲ್ಯಾಂಡ್ ಹಾಗೂ ವಿಶಾಲವಾದ ನಾರ್ಡಿಕ್ ಪ್ರದೇಶಕ್ಕೆ ನೀಡಿದ್ದ ಮೊದಲ ಅಧಿಕೃತ ಭೇಟಿಯ ಸಂದರ್ಭದಲ್ಲಿ ಅವರಿಗೆ ಆತಿಥ್ಯ ವಹಿಸಿದ್ದರು.

ನವದೆಹಲಿಯ ಭಾರತ್ ಮಂಟಪದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಬ್ರಿಕ್ಸ್ ನಾಯಕರ ಗೌರವಾರ್ಥ ಆಯೋಜಿಸಿದ್ದ ಔತಣಕೂಟದಲ್ಲಿ ಖಾಂಡ್ವಿ, ಪನ್ನೀರ್ ಲಾಬಾಬ್ದಾರ್, ಮಿಲ್ಲೆಟ್ ಪುಲಾವ್ ಸೇರಿದಂತೆ ವಿವಿಧ ಭಾರತೀಯ ಸಸ್ಯಾಹಾರಿ ಖಾದ್ಯಗಳನ್ನು ಮಾತ್ರ ಬಡಿಸಲಾಗಿತ್ತು. ಭಾರತದ ಬಹುಸಂಖ್ಯಾತರು ಮಾಂಸಾಹಾರಿಗಳಾಗಿದ್ದು, ಸರ್ಕಾರವು ತನ್ನ ಆಹಾರ ಆದ್ಯತೆಗಳನ್ನು ವಿದೇಶಿ ನಾಯಕರ ಮೇಲೆಯೂ ಹೇರುತ್ತಿದೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಸೇರಿದಂತೆ ವಿರೋಧ ಪಕ್ಷಗಳು ವಾಗ್ದಾಳಿ ನಡೆಸಿದ್ದವು. ಈ ರಾಜಕೀಯ ವಾಕ್ಸಮರದ ನಡುವೆ, ಐಸ್‌ಲ್ಯಾಂಡ್ ಮಾಜಿ ಅಧ್ಯಕ್ಷರ ಈ ಪೋಸ್ಟ್ ಜಾಲತಾಣಗಳಲ್ಲಿ ವ್ಯಾಪಕ ಗಮನ ಸೆಳೆದಿದೆ.