ಲಂಡನ್ : ಬ್ರಿಟನ್‌ನಲ್ಲಿ ನಡೆದ 43ನೇ ‘ಆರ್ಥಿಕ ಅಪರಾಧಗಳ ಮೇಲಿನ ಅಂತರರಾಷ್ಟ್ರೀಯ ವಿಚಾರಸಂಕಿರಣ’ದ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದ ಭಾರತದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್‌ರವರು ಜಾಗತಿಕ ಅಕ್ರಮ ಆಸ್ತಿ ಮತ್ತು ಕಪ್ಪು ಹಣದ ಅಗಾಧ ಪ್ರಮಾಣದ ಕುರಿತು ಕಳವಳ ವ್ಯಕ್ತಪಡಿಸಿದರು. ಪ್ರಪಂಚದಾದ್ಯಂತ ಒಂದು ವರ್ಷದಲ್ಲಿ ಬಿಳಿ ಮಾಡಲಾಗುವ ಕಪ್ಪು ಹಣದ ಪ್ರಮಾಣ ಎಷ್ಟಿದೆಯೆಂದರೆ, ವಿಶ್ವದ 800 ಕೋಟಿ ಜನರಿಗೆ ತಲಾ ಒಂದೊಂದು ಸಾಧಾರಣ ಲ್ಯಾಪ್‌ಟಾಪ್ ಹಂಚಿದ ಮೇಲೆಯೂ ಅಪಾರ ಪ್ರಮಾಣದ ಹಣ ಉಳಿಯುತ್ತದೆ. ಆದರೆ ಈ ಅಗಾಧ ಅಕ್ರಮ ಆಸ್ತಿಯಲ್ಲಿ ಶೇಕಡಾ ಒಂದಕ್ಕಿಂತಲೂ ಕಡಿಮೆ ಭಾಗವನ್ನು (100 ರಲ್ಲಿ 1 ಭಾಗ) ಮಾತ್ರ ಎಂದೋ ಒಮ್ಮೆ ವಶಪಡಿಸಿಕೊಳ್ಳಲು ಸಾಧ್ಯವಾಗುತ್ತಿದೆ ಎಂದು ಅವರು ಹೇಳಿದರು.

ವಿದೇಶಗಳಲ್ಲಿ ಬಚ್ಚಿಟ್ಟ ಹಾಗೂ ಕಾನೂನುಬಾಹಿರವಾಗಿ ಗಳಿಸಿದ ಆಸ್ತಿಯನ್ನು ಮರಳಿ ಪಡೆಯಲು ಇತರ ದೇಶಗಳೊಂದಿಗೆ ಮಾಡಿಕೊಂಡ ಪರಸ್ಪರ ಕಾನೂನು ನೆರವಿನ ಒಪ್ಪಂದಗಳು ಹೆಚ್ಚು ವಿಶ್ವಾಸಾರ್ಹವಾಗಿವೆ ಎಂಬುದನ್ನು ಭಾರತವು ತನ್ನ ಕಠಿಣ ಅನುಭವಗಳಿಂದ ಕಲಿತಿದೆ ಎಂದು ಮುಖ್ಯ ನ್ಯಾಯಮೂರ್ತಿಗಳು ತಿಳಿಸಿದರು. ಅಪರಾಧಿಯನ್ನು ಹಸ್ತಾಂತರದ ಮೂಲಕ ಭಾರತಕ್ಕೆ ಕರೆತರುವುದಕ್ಕಿಂತ, ಇಂತಹ ಒಪ್ಪಂದಗಳ ಮೂಲಕ ಅವನು ವಿದೇಶಕ್ಕೆ ತೆಗೆದುಕೊಂಡು ಹೋದ ಅಥವಾ ಅಡಗಿಸಿಟ್ಟ ಆಸ್ತಿಯನ್ನು ಹುಡುಕಿ ಮರಳಿ ತರುವುದು ಹೆಚ್ಚು ಪರಿಣಾಮಕಾರಿಯಾಗಿದೆ. ಕಾನೂನುಬಾಹಿರವಾಗಿ ಗಳಿಸಿದ ಹಣವು ಕಳ್ಳತನವಾದ ಅಥವಾ ಗಳಿಸಿದ ಸ್ಥಳದಲ್ಲೇ ಉಳಿಯದೆ ಇತರ ದೇಶಗಳಿಗೆ ವರ್ಗಾವಣೆಯಾಗುವುದರಿಂದ ಅಂತರರಾಷ್ಟ್ರೀಯ ಮಟ್ಟದ ಸಹಕಾರ ಅಗತ್ಯ ಎಂದು ಅವರು ಪ್ರತಿಪಾದಿಸಿದರು.