ಜಮ್ಮು ಮತ್ತು ಕಾಶ್ಮೀರ : ಉಧಂಪುರ, ರಿಯಾಸಿ ಹಾಗೂ ಕಥುವಾ ಜಿಲ್ಲೆಗಳ ವಿವಿಧ ಭಾಗಗಳಲ್ಲಿ ಶಂಕಿತ ವ್ಯಕ್ತಿಗಳು ಸಂಚರಿಸುತ್ತಿರುವ ಮಾಹಿತಿ ಲಭ್ಯವಾದ ಬೆನ್ನಲ್ಲೇ ಭದ್ರತಾ ಪಡೆಗಳು ಬೃಹತ್ ಶೋಧ ಕಾರ್ಯಾಚರಣೆ ಆರಂಭಿಸಿವೆ. ಉಗ್ರಗಾಮಿಗಳಿರಬಹುದಾದ ಅಡಗುದಾಣಗಳನ್ನು ಪತ್ತೆಹಚ್ಚಲು ಜಮ್ಮು-ಕಾಶ್ಮೀರ ಪೊಲೀಸ್ ಮತ್ತು ಸಿಆರ್‌ಪಿಎಫ್ (CRPF) ಜಂಟಿ ಪಡೆಗಳು ಇಡೀ ಪ್ರದೇಶವನ್ನು ಸುತ್ತುವರಿದು ತೀವ್ರ ತಪಾಸಣೆ ನಡೆಸುತ್ತಿವೆ.

ಅಧಿಕಾರಿಗಳು ನೀಡಿರುವ ಮಾಹಿತಿಯ ಪ್ರಕಾರ, ಸೋಮವಾರ ತಡರಾತ್ರಿ ಉಧಂಪುರ ಜಿಲ್ಲೆಯ ತಾಲೋಟ್ ಗ್ರಾಮದ ಪ್ರಕಾಶ್ ಚಂದ್ ಎಂಬುವವರ ಮನೆಯ ಬಾಗಿಲನ್ನು ಶಾಲು ಹೊದ್ದುಕೊಂಡಿದ್ದ ಇಬ್ಬರು ಶಂಕಿತ ವ್ಯಕ್ತಿಗಳು ತಟ್ಟಿದ್ದಾರೆ. ತಮಗೆ ಆಹಾರ ನೀಡುವಂತೆ ಕೇಳಿದ ಆ ಅಪರಿಚಿತರ ವರ್ತನೆಯಿಂದ ಅನುಮಾನಗೊಂಡ ಮನೆಯವರು ಬಾಗಿಲು ತೆರೆಯದೆ ಜಾಗರೂಕತೆ ವಹಿಸಿದ್ದಾರೆ. ಶಂಕಿತ ವ್ಯಕ್ತಿಗಳು ಅಲ್ಲಿಂದ ಖುಬಾನ್ ಪ್ರದೇಶದ ಕಡೆಗೆ ತೆರಳಿದ ತಕ್ಷಣ, ಮನೆಯವರು ಭದ್ರತಾ ಪಡೆಗಳಿಗೆ ತುರ್ತು ಮಾಹಿತಿ ರವಾನಿಸಿದ್ದಾರೆ.

ಸ್ಥಳೀಯರ ಸಮಯಪ್ರಜ್ಞೆಯಿಂದಾಗಿ ಪೊಲೀಸರು ಮತ್ತು ಸಿಆರ್‌ಪಿಎಫ್ ಪಡೆಗಳು ತಕ್ಷಣವೇ ಗ್ರಾಮಕ್ಕೆ ಧಾವಿಸಿ ಇಡೀ ಪ್ರದೇಶವನ್ನು ತಮ್ಮ ಹತೋಟಿಗೆ ತೆಗೆದುಕೊಂಡಿವೆ. ಇದೇ ವೇಳೆ ರಿಯಾಸಿ ಜಿಲ್ಲೆಯ ಸದಿನಿ ಅರಣ್ಯ ಪ್ರದೇಶದಲ್ಲಿ ಹಾಗೂ ಅಂತಾರಾಷ್ಟ್ರೀಯ ಗಡಿಗೆ ಹತ್ತಿರವಿರುವ ಕಥುವಾ ಜಿಲ್ಲೆಯ ಹೀರಾನಗರ ವಲಯದ ಹಲವು ಹಳ್ಳಿಗಳಲ್ಲಿಯೂ ಭದ್ರತಾ ಪಡೆಗಳು ತೀವ್ರ ಶೋಧ ಕೈಗೊಂಡಿವೆ. ಶಂಕಿತರ ಚಲನವಲನ ವರದಿಯಾಗಿರುವ ಎಲ್ಲಾ ಆಯಕಟ್ಟಿನ ಸ್ಥಳಗಳಲ್ಲಿ ಸದ್ಯ ಕಾರ್ಯಾಚರಣೆ ಮುಂದುವರಿದಿದ್ದು, ಗಡಿ ಭಾಗದಲ್ಲಿ ಕಣ್ಗಾವಲು ಹೆಚ್ಚಿಸಲಾಗಿದೆ.