ಸೌದಿ ಅರೇಬಿಯಾ : ಭಾರತದ ರಕ್ಷಣಾ ತಂತ್ರಜ್ಞಾನದಲ್ಲಿ ಹೊಸ ಇತಿಹಾಸ ಬರೆಯಲು ಶೇಷನಾಗ್ 150 ಸಜ್ಜಾಗಿದೆ. ಬೆಂಗಳೂರು ಮೂಲದ ನ್ಯೂಸ್ಪೇಸ್ ರಿಸರ್ಚ್ ಅಂಡ್ ಟೆಕ್ನಾಲಜೀಸ್ (NRT) ಅಭಿವೃದ್ಧಿಪಡಿಸಿರುವ ಈ ಸ್ವಾಮ್ ಡ್ರೋನ್, ಈಗ ಜಗತ್ತಿನ ಗಮನ ಸೆಳೆದಿದೆ. ಸೌದಿ ಅರೇಬಿಯಾದಲ್ಲಿ ನಡೆದ ವರ್ಲ್ಡ್ ಡಿಫೆನ್ಸ್ ಶೋ 2026 ರಲ್ಲಿ ಪ್ರದರ್ಶಿಸಲಾದ ಈ ಆಯುಧವು, ಭಾರತಕ್ಕೆ 1,000 ಕಿಲೋಮೀಟರ್ ದೂರದವರೆಗೂ ಹೋಗಿ ದಾಳಿ ಮಾಡುವ ದೀರ್ಘ ಶ್ರೇಣಿಯ ಶಕ್ತಿಯನ್ನು ನೀಡಿದೆ. ಇದು ಕೇವಲ ಒಂದು ಡ್ರೋನ್ ಅಲ್ಲ, ಬದಲಿಗೆ ಇದೊಂದು ಲೋಯಿಟರಿಂಗ್ ಮ್ಯೂನಿಷನ್ ಅಥವಾ ಕಾಮಿಕೇಜ್ ಡ್ರೋನ್. ಅಂದರೆ, ಶತ್ರುಗಳ ಪ್ರದೇಶದ ಮೇಲೆ ಹಾರುತ್ತಾ ನಿಗಾ ಇಡಬಲ್ಲ ಮತ್ತು ಗುರಿ ಪತ್ತೆಯಾದ ತಕ್ಷಣ ಕ್ಷಿಪಣಿಯಂತೆ ಅಪ್ಪಳಿಸಿ ಸ್ಫೋಟಗೊಳ್ಳಬಲ್ಲ ಮಾರಕ ಅಸ್ತ್ರವಾಗಿದೆ.

ಇದರ ದಾಳಿ ವ್ಯಾಪ್ತಿ 1,000 ಕಿಲೋಮೀಟರ್‌ಗಿಂತಲೂ ಹೆಚ್ಚು. ಸತತ 5 ಗಂಟೆಗಳ ಕಾಲ ಹಾರಾಟ ನಡೆಸಬಲ್ಲದು.  25 ರಿಂದ 40 ಕೆಜಿ ತೂಕದ ಸ್ಫೋಟಕಗಳನ್ನು ಹೊತ್ತೊಯ್ಯಬಲ್ಲದು. ಕೇವಲ 5 ಮೀಟರ್‌ಗಳ ಒಳಗೆ ಶತ್ರು ನೆಲೆಗೆ ನಿಖರವಾಗಿ ಅಪ್ಪಳಿಸುತ್ತದೆ. ಶೇಷನಾಗ್ ಡ್ರೋನ್‌ನ ಅಸಲಿ ತಾಕತ್ತು ಇರುವುದು ಅದರ ಸ್ವಾಮ್ ಅಥವಾ ಹುಳುಗಳ ಹಿಂಡಿನಂತಿರುವ ವ್ಯವಸ್ಥೆಯಲ್ಲಿ. ನೂರಾರು ಡ್ರೋನ್‌ಗಳು ಏಕಕಾಲದಲ್ಲಿ ಹಾರಿ ಶತ್ರುಗಳ ವಾಯು ರಕ್ಷಣಾ ವ್ಯವಸ್ಥೆಯನ್ನು ಗೊಂದಲಕ್ಕೆ ದೂಡುತ್ತವೆ. ಶತ್ರುಗಳ ರಾಡಾರ್‌ಗಳು ಒಂದು ಡ್ರೋನ್ ಅನ್ನು ಹೊಡೆದುರುಳಿಸುವಷ್ಟರಲ್ಲಿ, ಉಳಿದ ಹತ್ತಾರು ಡ್ರೋನ್‌ಗಳು ಅವರ ಮುಖ್ಯ ನೆಲೆಗಳನ್ನು ನಾಶಪಡಿಸಿರುತ್ತವೆ.

ಇದು ಬೆಲೆಬಾಳುವ ಕ್ರೂಸ್ ಕ್ಷಿಪಣಿಗಳಿಗಿಂತ ಅಗ್ಗದ ಮತ್ತು ಅಷ್ಟೇ ಪರಿಣಾಮಕಾರಿ ಪರ್ಯಾಯವಾಗಿದೆ. ಶತ್ರು ರಾಷ್ಟ್ರದ ಒಳಗಿನ ಕಮಾಂಡ್ ಸೆಂಟರ್‌ಗಳು, ತೈಲ ಡಿಪೋಗಳು ಮತ್ತು ಮದ್ದುಗುಂಡುಗಳ ಸಂಗ್ರಹಾಗಾರಗಳನ್ನು ಗುರಿಯಾಗಿಸಲು ಇದು ಸೂಕ್ತವಾಗಿದೆ. ಚೀನಾದ ಎಲ್‌ಎಸಿ (LAC) ಮತ್ತು ಪಾಕಿಸ್ತಾನದ ಎಲ್‌ಒಸಿ (LoC) ನಲ್ಲಿ ಇದನ್ನು ನಿಯೋಜಿಸಿದರೆ, ಯಾವುದೇ ಒಳನುಸುಳುವಿಕೆ ಅಥವಾ ಮಿಲಿಟರಿ ಜಮಾವಣೆಯನ್ನು ಮೈಲಿಗಳ ದೂರದಿಂದಲೇ ಚಿವುಟಿ ಹಾಕಬಹುದು. ಸಂಪೂರ್ಣವಾಗಿ ಭಾರತದಲ್ಲೇ ವಿನ್ಯಾಸಗೊಳಿಸಲಾದ ಈ ಡ್ರೋನ್, ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವನ್ನು ಹೊಂದಿದೆ. ಇದು ಮನುಷ್ಯನ ಹಸ್ತಕ್ಷೇಪವಿಲ್ಲದೆಯೇ ತನ್ನ ಗುರಿಯನ್ನು ಗುರುತಿಸಿ ಸಂಹರಿಸುವ ಸಾಮರ್ಥ್ಯ ಹೊಂದಿದೆ. ಭಾರತೀಯ ಸೇನೆ, ವಾಯುಸೇನೆ ಮತ್ತು ನೌಕಾಪಡೆಗಳ ದೀರ್ಘ ವ್ಯಾಪ್ತಿಯ ದಾಳಿ ಅಗತ್ಯಗಳನ್ನು ಪೂರೈಸಲು ಇದು ಪ್ರಬಲ ಅಸ್ತ್ರವಾಗಲಿದೆ ಎಂದು ರಕ್ಷಣಾ ಮೂಲಗಳು ತಿಳಿಸಿವೆ.