ನವದೆಹಲಿ: ದೇಶದಲ್ಲಿ ಕ್ಷಯ ರೋಗ (ಟಿಬಿ) ನಿರ್ಮೂಲನೆ ಮಾಡುವ ಹೋರಾಟಕ್ಕೆ ಮತ್ತಷ್ಟು ಬಲ ಬಂದಿದೆ. ದೇಶೀಯವಾಗಿ ಅಭಿವೃದ್ಧಿಪಡಿಸಲಾದ ಹೊಸ ರೋಗನಿರ್ಣಯ ಸಾಧನಗಳಿಗೆ ದೇಶದ ಉನ್ನತ ಆರೋಗ್ಯ ಸಂಶೋಧನಾ ಸಂಸ್ಥೆಯಾದ ಐಸಿಎಂಆರ್ (ICMR) ಅನುಮೋದನೆ ನೀಡಿದೆ. ಈ ಉಪಕರಣಗಳು ವೇಗವಾಗಿ ರೋಗ ಪತ್ತೆ ಮಾಡುವ ಸಾಮರ್ಥ್ಯದ ಜೊತೆಗೆ ಅಗ್ಗವೂ ಆಗಿವೆ ಎಂಬುದು ವಿಶೇಷ. ಸಮುದಾಯದಲ್ಲಿ ಟಿಬಿ ಹರಡುವುದನ್ನು ತಡೆಯಲು ಮತ್ತು ರೋಗಿಗಳಿಗೆ ಚಿಕಿತ್ಸೆ ಒದಗಿಸುವುದು ಮುಖ್ಯ. ಹೀಗಾಗಿ, ಕ್ಷಯ ರೋಗವನ್ನು ಶೀಘ್ರವಾಗಿ, ನಿಖರವಾಗಿ ಪತ್ತೆ ಮಾಡುವುದು ಅತ್ಯಂತ ನಿರ್ಣಾಯಕ ಅಂಶವಾಗಿದ್ದು, ಈ ಕಿಟ್​ಗಳು ನೆರವಾಗಲಿವೆ ಎಂದು ಅಂದಾಜಿಸಲಾಗಿದೆ. ಐಸಿಎಂಆರ್‌ ನೀಡಿದ ಮಾಹಿತಿಯ ಪ್ರಕಾರ, ಇತ್ತೀಚೆಗೆ ತಾನು ಅನುಮೋದಿಸಿದ ಸಾಧನವಾದ ಕ್ವಾಂಟಿಪ್ಲಸ್ ಎಂಬಿಟಿ ಫಾಸ್ಟ್ ಡಿಟೆಕ್ಷನ್ ಕಿಟ್ ತೆಲಂಗಾಣದ ಹುವೆಲ್ ಲೈಫ್‌ಸೈನ್ಸಸ್ ಅಭಿವೃದ್ಧಿಪಡಿಸಿದೆ. ಇದು ಶ್ವಾಸಕೋಶ ಟಿಬಿ ಪತ್ತೆ ಮಾಡುವ ಮೊದಲ ಓಪನ್ ಸಿಸ್ಟಮ್ ಆರ್​ಟಿ-ಪಿಸಿಆರ್​ ಪರೀಕ್ಷೆಯಾಗಿದೆ. ಇದು ಸದ್ಯ ಅಸ್ತಿತ್ವದಲ್ಲಿರುವ ಯಾವುದೇ ಪಿಸಿಆರ್ (PCR) ಯಂತ್ರದ ಮೂಲಕ ಕಾರ್ಯನಿರ್ವಹಿಸುತ್ತದೆ ಎಂದು ತಿಳಿಸಿದೆ. ಕ್ವಾಂಟಿಪ್ಲಸ್ ಸಾಧನವು ಏಕಕಾಲದಲ್ಲಿ 96 ಮಾದರಿಗಳನ್ನು ಪರೀಕ್ಷಿಸುವ ಸಾಮರ್ಥ್ಯ ಹೊಂದಿದೆ. ಇದರ ಮೂಲಕ ವಯಸ್ಕರಲ್ಲಿ ಕಫದ ಮಾದರಿಗಳ ಮೂಲಕ ಟಿಬಿ ಪತ್ತೆ ಮಾಡಬಹುದು. ಈ ಉತ್ಪನ್ನವು, ರೋಗನಿರ್ಣಯಿಸುವ ಸಾಮರ್ಥ್ಯ ಹೆಚ್ಚಳ ಜೊತೆಗೆ ವೆಚ್ಚವೂ ಕಡಿಮೆಯಾಗಲಿದೆ ಎಂದು ಅಂದಾಜಿಸಲಾಗಿದೆ. ಟಿಬಿ ಪರೀಕ್ಷೆಯ ವೆಚ್ಚವನ್ನು ಇದು ಐದನೇ ಒಂದು ಭಾಗದಷ್ಟು ಕಡಿಮೆ ಮಾಡಬಹುದು ಎಂದು ಮೂಲಗಳು ತಿಳಿಸಿವೆ. ಐಸಿಎಂಆರ್‌ ಅನುಮೋದಿಸಿದ ಮತ್ತೊಂದು ಕಿಟ್​ ಎಂದರೆ, ಯುನಿಎಎಮ್‌ಪಿ ಎಂಬಿಟಿ ನ್ಯೂಕ್ಲಿಯಿಕ್ ಆ್ಯಸಿಡ್ ಟೆಸ್ಟ್ ಕಾರ್ಡ್. ಇದನ್ನೂ ಸಹ ಹುವೆಲ್ ಲೈಫ್‌ಸೈನ್ಸಸ್ ತಯಾರಿಸಿದೆ. ಅಧಿಕೃತ ಮೂಲದ ಪ್ರಕಾರ, ಈ ಸಾಧನವು ರೋಗಿ ಸ್ನೇಹಿ ರೋಗನಿರ್ಣಾಯಕ ಕಿಟ್​ ಆಗಿದೆ. ಮಕ್ಕಳು ಮತ್ತು ವೃದ್ಧರಿಗೆ ಕಷ್ಟಕರವಾದ ಕಫದ ಮಾದರಿಗಳ ಬದಲಿಗೆ, ನಾಲಿಗೆ ಸ್ವ್ಯಾಬ್‌ಗಳನ್ನು ಬಳಸಿಕೊಂಡು ರೋಗವನ್ನು ನಿರ್ಧರಿಸಬಹುದಾಗಿದೆ.