ಬಿಹಾರ : ಸೀತಾಮಾತೆ ಜನಿಸಿದ ಪವಿತ್ರ ಸ್ಥಳ ಇಲ್ಲಿನ 'ಪುನೌರಾ ಧಾಮ್‌' ಅನ್ನು ವಿಶ್ವ ದರ್ಜೆಯ ಆಧ್ಯಾತ್ಮಿಕ ತಾಣವನ್ನಾಗಿ ಅಭಿವೃದ್ಧಿಪಡಿಸುವ ಬಿಹಾರ ಸರ್ಕಾರದ ಯೋಜನೆ ಕುರಿತು ದೇಗುಲದ ಅರ್ಚಕ ಕೌಶಲ್ ಕಿಶೋರ್ ದಾಸ್ ಮಾತನಾಡಿದ್ದಾರೆ. ಪಾಟ್ನಾದಿಂದ 140 ಕಿ.ಮೀ ದೂರದಲ್ಲಿರುವ ಈ ದೇಗುಲದಲ್ಲಿ 82 ವರ್ಷದ ಕೌಶಲ್​ ಕಿಶೋರ್​ ದಾಸ್​ ಕಾರ್ಯ ನಿರ್ವಹಿಸುತ್ತಿದ್ದಾರೆ. "ಸೀತಾಮಾತೆಯ ಜನ್ಮಸ್ಥಳದ ಅಭಿವೃದ್ಧಿ ಸುದ್ದಿ ನನಗೆ ಸಂತಸ ತಂದಿದೆ. ಇದು ನಮ್ಮ ದೀರ್ಘಕಾಲದ ಕನಸು. ಆದರೆ, ಯೋಜನೆಯ ಬಗ್ಗೆ ನಮ್ಮನ್ನು ಯಾರೂ ಸಂಪರ್ಕಿಸಿಲ್ಲ. ಏನಾಗುತ್ತಿದೆ ಎಂದೇ ಗೊತ್ತಾಗುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು. "ಇಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಧಾರ್ಮಿಕ ಟ್ರಸ್ಟ್​ ಅನ್ನು ತೆಗೆದು ಹಾಕಿ ಹೊಸ ಟ್ರಸ್ಟ್​ ರೂಪಿಸಿದ್ದು, ಅದರಲ್ಲಿ ನಾನೂ ಕೂಡ ಸದಸ್ಯ. ಹೀಗಿದ್ದರೂ ಈ ವಿಚಾರ ಪತ್ರಿಕೆಗಳ ಮೂಲಕ ನನಗೆ ತಿಳಿಯಿತು. ಜಿಲ್ಲಾಡಳಿತದ ಯಾರೂ ಕೂಡ ನನ್ನನ್ನು ಸಂಪರ್ಕಿಸಿಲ್ಲ" ಎಂದರು. ಅರ್ಚಕರ ಉತ್ತರಾಧಿಕಾರಿ ರಾಮ್ ಕುಮಾರ್ ದಾಸ್, ಇತರ ಪುರೋಹಿತರು, ಉಸ್ತುವಾರಿಗಳು, ಅಡುಗೆಯವರು ಮತ್ತು ತೋಟಗಾರರು ಸೇರಿದಂತೆ ಸುಮಾರು 22 ಜನರು ಇಲ್ಲಿದ್ದಾರೆ.

"ಮಹಂತ್​ (ಅರ್ಚಕರು) ಅವರನ್ನು ಉತ್ತರಾಧಿಕಾರಿಯಾಗಿ ಆಯ್ಕೆ ಮಾಡಲಾಗುವುದು. ನೂರಾರು ವರ್ಷಗಳಿಂದ ಈ ಆಚರಣೆ ಮುಂದುವರೆದಿದೆ. ಅದನ್ನು ನಿರ್ವಹಣೆ ಮಾಡಬೇಕಿದೆ. ಆದರೆ, ಈ ಬಗ್ಗೆ ಯಾವುದೇ ಸ್ಪಷ್ಟತೆಯಿಲ್ಲ. ಏನಾಗುತ್ತದೆ ಎಂದು ನಮಗೆ ತಿಳಿಯುತ್ತಿಲ್ಲ" ಎಂದು ರಾಮ್ ಕುಮಾರ್ ಬೇಸರ ವ್ಯಕ್ತಪಡಿಸಿದರು. ಸರ್ಕಾರ ಈ ವರ್ಷ ಮೇ ತಿಂಗಳಲ್ಲಿ ಸೀತೆಯ ಜನ್ಮಸ್ಥಳವನ್ನು ಪುನರ್‌ಅಭಿವೃದ್ಧಿ ಮಾಡುವ ಉದ್ದೇಶದಿಂದ 9 ಸದಸ್ಯರ ಶ್ರೀ ಜಾನಕಿ ರಾಮ ಭೂಮಿ ಪುನೌರಾ ಧಾಮ ಮಂದಿರ ನ್ಯಾಯ ಸಮಿತಿ ರಚಿಸಿದೆ. ಟ್ರಸ್ಟ್​ ಅಧ್ಯಕ್ಷರಾಗಿ ಬಿಹಾರ ಸಿಎಂ, ಉಪಾಧ್ಯಕ್ಷರಾಗಿ ಅಭಿವೃದ್ಧಿ ಆಯುಕ್ತರು, ಕಾರ್ಯದರ್ಶಿಯಾಗಿ ಸೀತಾಮರ್ಹಿ ಜಿಲ್ಲಾಧಿಕಾರಿ ಹಾಗೂ ಖಂಜಾಚಿಯಾಗಿ ಉಪ ಅಭಿವೃದ್ಧಿ ಆಯುಕ್ತರು ಇದ್ದಾರೆ. ಇನ್ನುಳಿದ ಐವರು ಸದಸ್ಯರಲ್ಲಿ ದಾಸ್​, ತಿರ್ಹಟ್​ ವಲಯದ ಆಯುಕ್ತರು, ಪ್ರವಾಸೋದ್ಯದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಅಥವಾ ರಸ್ತೆ ನಿರ್ಮಾಣ, ನಗರಾಭಿವೃದ್ಧಿ ಮತ್ತು ಗೃಹ ಇಲಾಖೆ ಕಾರ್ಯದರ್ಶಿ ಇರುತ್ತಾರೆ.