ಲಂಡನ್‌ : ಲಂಡನ್‌ನಲ್ಲಿ ನಡೆದ ಮಹಿಳಾ ಡಬಲ್ಸ್‌ನ ರೋಚಕ ಫೈನಲ್ ಪಂದ್ಯದಲ್ಲಿ ಚೀನಾದ ಗುವೊ ಹನ್ಯು ಮತ್ತು ಫ್ರಾನ್ಸ್‌ನ ಕ್ರಿಸ್ಟಿನಾ ಮ್ಲಾಡೆನೋವಿಕ್ ಜೋಡಿಯು ಅದ್ಭುತ ಪ್ರದರ್ಶನ ನೀಡಿತು. ಟೂರ್ನಿಯಲ್ಲಿ 10ನೇ ಶ್ರೇಯಾಂಕ ಹೊಂದಿದ್ದ ಕ್ರಿಸ್ಟಿನಾ-ಗುವೋ ಜೋಡಿಯು ಎರಡನೇ ಶ್ರೇಯಾಂಕದ ಬಲಿಷ್ಠ ಗೇಬ್ರಿಯೆಲಾ ಡಬ್ರೋವ್ಸ್ಕಿ ಮತ್ತು ಲೂಯಿಸಾ ಸ್ಟೆಫಾನಿ ಸವಾಲನ್ನು 6-3, 7-5 ನೇರ ಸೆಟ್‌ಗಳಿಂದ ಧೂಳೀಪಟ ಮಾಡಿತು. ಪಂದ್ಯದ ಆರಂಭದಿಂದಲೇ ಸಂಪೂರ್ಣ ನಿಯಂತ್ರಣ ಸಾಧಿಸಿದ ಈ ಜೋಡಿಯು ಕೇವಲ ಒಂದು ಗಂಟೆ 32 ನಿಮಿಷಗಳಲ್ಲಿ ಗೆಲುವು ತನ್ನದಾಗಿಸಿಕೊಂಡಿತು. ಇದು ಇವರಿಬ್ಬರು ಜೊತೆಯಾಗಿ ಜಯಿಸಿದ ಮೊದಲ ಗ್ರಾಂಡ್​ ಸ್ಲಾಂ ಪ್ರಶಸ್ತಿಯಾಗಿದೆ. ಈಗಾಗಲೇ ಮಹಿಳಾ ಡಬಲ್ಸ್​ ವಿಭಾಗದಲ್ಲಿ 6 ಗ್ರಾಂಡ್​ ಸ್ಲಾಂ ಪ್ರಶಸ್ತಿ ಜಯಿಸಿರುವ 33 ವರ್ಷದ ಅನುಭವಿ ಕ್ರಿಸ್ಟಿನಾಗೆ ಇದು ವಿಂಬಲ್ಡನ್​ನಲ್ಲಿ ಒಲಿದ ಮೊದಲ ಕಿರೀಟವಾದರೆ, ಗುವೊ ಪಾಲಿಗೆ ಇದು ವೃತ್ತಿಜೀವನದ ಚೊಚ್ಚಲ ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿಯಾಗಿ ಮೂಡಿಬಂದಿದೆ.

​ಮತ್ತೊಂದೆಡೆ, ಪುರುಷರ ಡಬಲ್ಸ್​ ವಿಭಾಗದ ಫೈನಲ್‌ ಪಂದ್ಯವೂ ಅಷ್ಟೇ ರೋಚಕತೆಯಿಂದ ಕೂಡಿತ್ತು. ಬ್ರಿಟನ್​ನ ಹೆನ್ರಿ ಪ್ಯಾಟನ್​ ಮತ್ತು ಫಿನ್ಲೆಂಡ್​ನ ಹ್ಯಾರಿ ಹೆಲಿಯೋವಾರಾ ಜೋಡಿಯು ಅದ್ಭುತ ಹೊಂದಾಣಿಕೆಯ ಆಟ ಪ್ರದರ್ಶಿಸಿ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು. ಎಲ್​ ಸಾಲ್ವಡಾರ್​ನ ಮಾರ್ಸೆಲೊ ಅರೆವಾಲೋ ಮತ್ತು ಕ್ರೊಯೇಷಿಯಾದ ಮೇಟ್​ ಪಾವಿಕ್​ ಜೋಡಿಯ ವಿರುದ್ಧ ತೀವ್ರ ಹೋರಾಟ ನಡೆಸಿದ ಪ್ಯಾಟನ್-ಹೆಲಿಯೋವಾರಾ ಜೋಡಿಯು 7-6, 7-6 ನೇರ ಸೆಟ್​ಗಳ ಅಂತರದಿಂದ ರೋಚಕ ಗೆಲುವು ದಾಖಲಿಸಿ ಟ್ರೋಫಿಗೆ ಮುತ್ತಿಕ್ಕಿತು.