ಕ್ರೊಯೇಷಿಯಾ : ಹಾಲಿ ವಿಶ್ವ ಚಾಂಪಿಯನ್ ಡಿ. ಗುಕೇಶ್ ಶುಕ್ರವಾರ ನಡೆದ ಸೂಪರ್ ಯುನೈಟೆಡ್ ರಾಪಿಡ್ & ಬ್ಲಿಟ್ಜ್ ಚೆಸ್​​ ಟೂರ್ನಿಯ ರಾಪಿಡ್ ಪ್ರಶಸ್ತಿಯನ್ನು ಗೆಲ್ಲುವ ಮೂಲಕ ಮತ್ತೊಂದು ಕಿರೀಟವನ್ನು ತಮ್ಮ ಮುಡಿಗೇರಿಸಿಕೊಂಡಿದ್ದಾರೆ. ಈ ಸ್ಪರ್ಧೆಯು 2025ರ ಗ್ರ್ಯಾಂಡ್ ಚೆಸ್ ಟೂರಿನ ಭಾಗವಾಗಿದ್ದು, ಕ್ರೊಯೇಷಿಯಾದ ಜಾಗ್ರೆಬ್​​ನಲ್ಲಿ ನಡೆಯುತ್ತಿದೆ. 19 ವರ್ಷದ ಭಾರತೀಯ ಆಟಗಾರ ನಿಖರತೆ, ಸಂಯಮ ಮತ್ತು ಅದ್ಭುತ ಫಾರ್ಮ್ ಪ್ರದರ್ಶಿಸಿ ಸಂಭಾವ್ಯ 18 ಅಂಕಗಳಲ್ಲಿ 14 ಅಂಕಗಳೊಂದಿಗೆ ಟೂರ್ನಮೆಂಟ್​​ನಲ್ಲಿ ಅಗ್ರಸ್ಥಾನ ಪಡೆದರು.

ಗುಕೇಶ್ ಟೂರ್ನಮೆಂಟ್​​ನಲ್ಲಿ ಉತ್ತಮ ಆರಂಭ ಪಡೆದಿರಲಿಲ್ಲ. ಮೊದಲ ಸುತ್ತಿನಲ್ಲಿ ಜಾನ್-ಕ್ರಿಜ್ಟೋಫ್ ಡುಡಾ ವಿರುದ್ಧ ಸೋತಿದ್ದರು. ಆದಾಗ್ಯೂ, ಬಳಿಕ ಅವರು ಸತತ ಐದು ಜಯಗಳೊಂದಿಗೆ, ಟೂರ್ನಿಯಲ್ಲಿ ಹಾದಿಯನ್ನೇ ಬದಲಿಸಿಕೊಂಡರು. ಇದರಲ್ಲಿ 4ನೇ ಸುತ್ತಿನಲ್ಲಿ ವಿಶ್ವದ ನಂ. 1 ಮ್ಯಾಗ್ನಸ್ ಕಾರ್ಲ್ಸೆನ್ ವಿರುದ್ಧ ಅದ್ಭುತ ಗೆಲುವು ಸೇರಿದಂತೆ, ಈ ಫಲಿತಾಂಶವು ಅವರನ್ನು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿ ಭದ್ರವಾಗಿ ಇರಿಸಿತು. ಅಂತಿಮ ಸುತ್ತಿನಲ್ಲಿ ಯುನೈಟೆಡ್ ಸ್ಟೇಟ್ಸ್​​ ನ ವೆಸ್ಲಿ ಸೋ ವಿರುದ್ಧ ಜಯ ಗಳಿಸುವ ಮೂಲಕ ಅವರು ರಾಪಿಡ್ ವಿಭಾಗದಲ್ಲಿ ಅಭಿಯಾನವನ್ನು ಕೊನೆಗೊಳಿಸಿದರು. ಗುಕೇಶ್ 36-ನಡೆಗಳ ಸಮನ್ವಯದ ಪ್ರದರ್ಶನ ತೋರಿದರು. ಈ ಮೂಲಕ ಎರಡು ಪೂರ್ಣ ಅಂಕಗಳು ಲಭಿಸಿದವು. ಟೂರ್ನಿಯಲ್ಲಿ ಅವರ ಅದ್ಭುತ ಓಟದಲ್ಲಿ, ಆರು ಗೆಲುವುಗಳು, ಎರಡು ಡ್ರಾಗಳು ಮತ್ತು ಒಂದು ಸೋಲು ಕಂಡರು. 3ನೇ ​​ದಿನದಂದು ಗುಕೇಶ್ ಅವರ ಅಭಿಯಾನವು ಡಚ್ ಗ್ರ್ಯಾಂಡ್​ ಮಾಸ್ಟರ್​​ ಅನೀಶ್ ಗಿರಿ ವಿರುದ್ಧ ಡ್ರಾದೊಂದಿಗೆ ಪ್ರಾರಂಭವಾಯಿತು. ಆಟದ ಮಧ್ಯಮ ಭಾಗವನ್ನು ತಲುಪಿದಾಗ, ಇಬ್ಬರೂ ಎದುರಾಳಿಗಳು ಕೈಕುಲುಕಿದರು. ದಿನದ ಎರಡನೇ ಪಂದ್ಯದಲ್ಲಿ, ಕ್ರೊಯೇಷಿಯಾದ ಇವಾನ್ ಅರಿಕ್ ವಿರುದ್ಧ 87-ನಡೆಗಳ ಮುಖಾಮುಖಿಯಲ್ಲಿ ಗುಕೇಶ್ ಮಾರ್ಷಲ್ ಗ್ಯಾಂಬಿಟ್ ​​ಅನ್ನು ಬಳಸಿಕೊಂಡರು. ಈ ಮುಖಾಮುಖಿಯೂ ಕೂಡ ರೋಚಕ ಡ್ರಾದಲ್ಲಿ ಕೊನೆಗೊಂಡಿತು.

ವಿಶ್ವದ ನಂ. 1 ಮ್ಯಾಗ್ನಸ್ ಕಾರ್ಲ್ಸನ್ ತನ್ನ ಆರಂಭಿಕ ಪಂದ್ಯದಲ್ಲಿ ಫ್ಯಾಬಿಯಾನೊ ಕರುವಾನಾ ಅವರನ್ನು ಸೋಲಿಸುವ ಮೂಲಕ ಉತ್ತಮ ಆರಂಭದೊಂದಿಗೆ ದಿನವನ್ನು ಪುನರಾರಂಭಿಸಿದರು. ಆದರೆ ನೋಡಿರ್ಬೆಕ್ ಅಬ್ದುಸತ್ತೊರೊವ್ ವಿರುದ್ಧದ ಮುಂದಿನ ಮುಖಾಮುಖಿಯಲ್ಲಿ ಡ್ರಾ ಸಾಧಿಸಿದ್ದರಿಂದ ಅಗ್ರ ಸ್ಪರ್ಧಿಗಳೊಂದಿಗೆ ಅಂತರವನ್ನು ಕಡಿಮೆ ಮಾಡುವ ಅವಕಾಶವನ್ನು ಕಳೆದುಕೊಂಡರು. ಟೂರ್ನಮೆಂಟ್​​ನಲ್ಲಿ ಗುಕೇಶ್ ಅವರನ್ನು ಸೋಲಿಸಿದ್ದ ಏಕೈಕ ಆಟಗಾರ ದುಡಾ, ಅಂಕಪಟ್ಟಿಯಲ್ಲಿ ಎರಡನೇ ಸ್ಥಾನ ಪಡೆದರು.