ನವದೆಹಲಿ: ಭಾರತ ಕ್ರಿಕೆಟ್ ತಂಡದ ವೇಗದ ಬೌಲರ್ ಮೊಹಮ್ಮದ್​ ಶಮಿ ಅವರು ತಮ್ಮ ಮಾಜಿ ಪತ್ನಿ ಹಸೀನ್​ ಜಹಾನ್​ ಅವರಿಗೆ ಪ್ರತೀ ತಿಂಗಳು 4 ಲಕ್ಷ ರೂ ನಿರ್ವಹಣಾ ಭತ್ಯೆ ನೀಡಬೇಕು. ಇದರಲ್ಲಿ 1.5 ಲಕ್ಷ ರೂ ಪತ್ನಿಗೆ ಹಾಗೂ ಉಳಿದ 2.5 ಲಕ್ಷ ಮಗಳ ಆರೈಕೆಗೆ ಎಂದು ಕೋಲ್ಕತ್ತಾ ಹೈಕೋರ್ಟ್​ ಮಂಗಳವಾರ ತೀರ್ಪು ನೀಡಿದೆ. ಇದಲ್ಲದೆ ಕಳೆದ 7 ವರ್ಷದ ನಿರ್ವಹಣಾ ಭತ್ಯೆ ನೀಡುವಂತೆ ಆದೇಶದಲ್ಲಿ ತಿಳಿಸಿದ್ದು, ಇದರ ಒಟ್ಟು ಮೊತ್ತ 3.36 ಕೋಟಿ ರೂ ಆಗುತ್ತದೆ. ಇದಕ್ಕೂ ಮೊದಲು ಹಸೀನ್​ ಜಹಾನ್​ ಪ್ರತೀ ತಿಂಗಳು 7 ಲಕ್ಷ ರೂ ಭತ್ಯೆ ನೀಡುವಂತೆ ಬೇಡಿಕೆ ಇಟ್ಟು ಅರ್ಜಿ ಸಲ್ಲಿಸಿದ್ದರು. ಆದರೆ ಈ ಅರ್ಜಿಯನ್ನು ನ್ಯಾಯಾಲಯ ತಿರಸ್ಕರಿಸಿದೆ.

ಈ ಹಿಂದೆ ಅಲಿಪುರ ನ್ಯಾಯಾಲಯವು ಮಾಜಿ ಪತ್ನಿ ಹಾಗೂ ಮಗುವಿಗೆ ಪ್ರತೀ ತಿಂಗಳು 80,000 ನೀಡುವಂತೆ ಶಮಿಗೆ ಆದೇಶಿಸಿತ್ತು. ಬಳಿಕ ಬದಲಾವಣೆ ಮಾಡಿ, ಪತ್ನಿಗೆ 50,000 ಹಾಗೂ ಪುತ್ರಿಗೆ 80,000 ರೂ ನೀಡುವಂತೆ ಆದೇಶಿಸಿದ್ದರು. ಮೊಹಮ್ಮದ್ ಶಮಿ 2014ರಲ್ಲಿ ಮಾಡೆಲ್​ ಹಸೀನ್​ ಜಹಾನ್ ಅವರನ್ನು ವರಿಸಿದ್ದರು. 2015ರಲ್ಲಿ ದಂಪತಿಗೆ ಹೆಣ್ಣು ಮಗು ಜನಿಸಿತ್ತು. ಮುಂದಿನ ದಿನಗಳಲ್ಲಿ ಹಸೀನ್ ಅವರು​ ಶಮಿ ಮೇಲೆ ಕೌಟುಂಬಿಕ ಹಿಂಸೆ ಮತ್ತು ಇತರ ಮಹಿಳೆಯರೊಂದಿಗೆ ಸಂಬಂಧ ಹೊಂದಿರುವ ಗಂಭೀರ ಆರೋಪಗಳನ್ನು ಮಾಡಿದ್ದರು. 2018ರಿಂದ ಇಬ್ಬರೂ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರು. 2022ರಲ್ಲಿ ವಿಚ್ಛೇದನ ಪಡೆದಿದ್ದರು.