ಇಂಗ್ಲೆಂಡ್ : ಐದು ಶತಕಗಳು ಸಿಡಿಸಿದ ಬಳಿಕವೂ ಟೆಸ್ಟ್​ನಲ್ಲಿ ಸೋಲನ್ನು ಕಂಡ ಮೊದಲ ತಂಡವಾಗಿ ಭಾರತ ಕೆಟ್ಟ ದಾಖಲೆ ಬರೆದಿದೆ. ಈ ಹಿಂದೆ 1928ರಲ್ಲಿ ಆಸ್ಟ್ರೇಲಿಯಾ ತಂಡ ಟೆಸ್ಟ್​ವೊಂದರಲ್ಲಿ 4 ಶತಕ ಸಿಡಿಸಿ ಸೋಲನ್ನು ಕಂಡಿತ್ತು. ಇದೀಗ ಭಾರತ ಈಕೆಟ್ಟ ದಾಖಲೆಯನ್ನು ತನ್ನ ಹೆಸರಿಗೆ ಸೇರಿಸಿಕೊಂಡಿದೆ. 148 ವರ್ಷಗಳ ಕ್ರಿಕೆಟ್​ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಐದು ಶತಕ ಸಿಡಿಸಿ ಸೋಲನ್ನು ಕಂಡ ತಂಡವಾಗಿ ಕೆಟ್ಟ ದಾಖಲೆ ಬರೆದಿದೆ. ಆ್ಯಂಡ್ರಸನ್​ ತೆಂಡೂಲ್ಕರ್​ ಟ್ರೋಫಿ ಭಾಗವಾಗಿ ನಡೆಯುತ್ತಿರುವ ಐದು ಪಂದ್ಯಗಳ ಟೆಸ್ಟ್​ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ತಂಡ ಇಂಗ್ಲೆಂಡ್ ವಿರುದ್ಧ 5 ವಿಕೆಟ್​ಗಳಿಂದ ಸೋಲನ್ನು ಕಂಡಿದೆ.

ಹೊಸ ನಾಯಕ ಶುಭ್​ಮನ್ ಗಿಲ್​ ನೇತೃತ್ವದಲ್ಲಿ ಮೈದಾನಕ್ಕಿಳಿದ ಟೀಮ್​ ಇಂಡಿಯಾ ಈ ಪಂದ್ಯದಲ್ಲಿ ಟಾಸ್​ ಸೋಲಿನೊಂದಿಗೆ ಬ್ಯಾಟಿಂಗ್​ಗೆ ಆಗಮಿಸಿತು. ಮೊದಲ ಇನ್ನಿಂಗ್ಸ್‌ನಲ್ಲಿ ಜೈಸ್ವಾಲ್​, ಗಿಲ್ ಮತ್ತು ಪಂತ್​ ಅವರ ಶತಕದ ಸಹಾಯದಿಂದ 471 ರನ್‌ಗಳನ್ನು ಗಳಿಸಿತು. ಇದಕ್ಕುತ್ತರವಾಗಿ ಇಂಗ್ಲೆಂಡ್ ಕೂಡ ಉತ್ತಮ ಪ್ರದರ್ಶನ ನೀಡಿ ಮೊದಲ ಇನ್ನಿಂಗ್ಸ್‌ನಲ್ಲಿ 465 ರನ್‌ಗಳಿಗೆ ಸರ್ವಪತನ ಕಂಡಿತು. ಭಾರತ ಕೇವಲ 6 ರನ್‌ಗಳ ಮುನ್ನಡೆಯನ್ನು ಪಡೆಯಿತು. ಎರಡನೇ ಇನ್ನಿಂಗ್ಸ್‌ ಆರಂಭಿಸಿದ ಟೀಮ್​ ಇಂಡಿಯಾ ರಾಹುಲ್ ಮತ್ತು ಪಂತ್ ಅವರ ಶತಕದ ಸಹಯಾದಿಂದ 364 ರನ್‌ಗಳನ್ನು ಕಲೆಹಾಕಿ ಇಂಗ್ಲೆಂಡ್‌ಗೆ ಗೆಲ್ಲಲು 371 ರನ್‌ಗಳ ಗುರಿಯನ್ನು ನೀಡಿತು. ಈ ಗುರಿಯನ್ನು ಬೆನ್ನು ಹತ್ತಿದ ಆಂಗ್ಲ ಪಡೆ ಬೆನ್ ಡಕೆಟ್ ಅವರ ಶತಕ, ಜ್ಯಾಕ್ ಕ್ರೌಲಿ ಮತ್ತು ಜೋ ರೂಟ್ ಅವರ ಅದ್ಭುತ ಅರ್ಧಶತಕಗಳಿಂದಾಗಿ 82 ಓವರ್‌ಗಳಲ್ಲಿ 373 ರನ್‌ಗಳನ್ನು ಗಳಿಸುವ ಮೂಲಕ 5 ವಿಕೆಟ್‌ಗಳ ಜಯ ಸಾಧಿಸಿತು. ಈ ಸೋಲಿನೊಂದಿಗೆ, ಐದು ಪಂದ್ಯಗಳ ಸರಣಿಯಲ್ಲಿ ಭಾರತ 1-0 ಯಿಂದ ಹಿನ್ನಡೆ ಅನುಭವಿಸಿದೆ.