ಬೆಂಗಳೂರು: ಕರ್ನಾಟಕದ ಉದಯೋನ್ಮುಖ ಕುಸ್ತಿಪಟುಗಳು ನಾಗುರದಲ್ಲಿ ಈಚೆಗೆ ನಡೆದ 15 ವರ್ಷದೊಳಗಿನವರ ರಾಷ್ಟ್ರೀಯ ಕುಸ್ತಿ ಚಾಂಪಿಯನ್‌ಷಿಪ್‌ನಲ್ಲಿ ಒಂದು ಚಿನ್ನ ಸೇರಿದಂತೆ ಐದು ಪದಕಗಳನ್ನು ಗೆದ್ದಿದ್ದಾರೆ. ಕರ್ನಾಟಕದ ತೈಮ್ಮೆಶಿ ಜಿ.ಎಂ. ಅವರು ಗ್ರೀಕೊ-ರೋಮನ್ 62 ಕೆ.ಜಿ ವಿಭಾಗದ ಫೈನಲ್‌ನಲ್ಲಿ 6-1ರಿಂದ ಮಹಾರಾಷ್ಟ್ರದ ದರ್ಪ್ಸ್ ಚೌಧರಿ ವಿರುದ್ಧ ಗೆದ್ದು, ಚಿನ್ನಕ್ಕೆ ಕೊರಳೊಡ್ಡಿದರು.

ಮಹಿಳಾ ಕುಸ್ತಿ ವಿಭಾಗದಲ್ಲಿ ಸುಶ್ಮಿತಾ ಕಮ್ಮಾರ್ (36 ಕೆ.ಜಿ) ಬೆಳ್ಳಿ ಪದಕ ಗೆದ್ದರು. ಫ್ರೀಸ್ಟೈಲ್ ಕುಸ್ತಿಯಲ್ಲಿ (52 ಕೆ.ಜಿ) ಮೋಹನ್‌ ರಾಜ್, ಗ್ರೀಕೊ-ರೋಮನ್ (48 ಕೆ.ಜಿ) ವಿಭಾಗದಲ್ಲಿ ಯಂಕಪ್ಪ ಕೂಡಗಿ, ಮಹಿಳಾ ಕುಸ್ತಿ (50 ಕೆ.ಜಿ) ವಿಭಾಗದಲ್ಲಿ ಪುಷ್ಪಾ ನಾಯಕ್ ಅವರು ಕಂಚಿನ ಪದಕ ಜಯಿಸಿದರು. ಭಾರತ ಕುಸ್ತಿ ಫೆಡರೇಷನ್ (ಡಬ್ಲ್ಯುಎಫ್‌ಐ) ಆಶ್ರಯದಲ್ಲಿ ಮಹಾರಾಷ್ಟ್ರ ಕುಸ್ತಿಗಿರಿ ಸಂಘವು ಜೂನ್ 20 ರಿಂದ 22ರವರೆಗೆ ಈ ಟೂರ್ನಿಯನ್ನು ನಾಗುರದಲ್ಲಿ ಆಯೋಜಿಸಿತ್ತು.