ಹೈದರಾಬಾದ್: ಐಸಿಸಿ ಪ್ರಶಸ್ತಿಗಳನ್ನು ಗೆಲ್ಲುವಲ್ಲಿ ಪ್ರತಿ ಬಾರಿಯೂ ಎಡವುತ್ತಿದ್ದ ತಂಡವು, ಚೋಕರ್ಸ್​ ಎಂಬ ಹಣೆಪಟ್ಟಿ ಕಟ್ಟಿಕೊಂಡಿತ್ತು. ತಾಳ್ಮೆ, ಶ್ರಮ, ಕೌಶಲ್ಯ ಇದ್ದರೆ ಒಂದಲ್ಲಾ ಒಂದು ದಿನ ಗೆದ್ದೇ ಗೆಲ್ಲುತ್ತೇವೆ ಎಂಬುದಕ್ಕೆ ದಕ್ಷಿಣ ಆಫ್ರಿಕಾ ತಂಡವೇ ಮಾದರಿ. ತಂಡದ ಆಟಗಾರರನ್ನೂ ಚೋಕರ್ಸ್​ ಎಂದು ಅಭಿಮಾನಿಗಳು ಹೀಯಾಳಿಸಿದ್ದು ಇತಿಹಾಸ. ಅವಮಾನ, ನೋವುಗಳನ್ನು ಮೆಟ್ಟಿನಿಂತ ಹರಿಣಗಳ ತಂಡವು ಕೊನೆಗೂ ಕ್ರಿಕೆಟ್​ ಲೋಕದಲ್ಲಿ ತಾನೂ ಕಿಂಗ್​ ಎಂಬುದನ್ನು ಸಾಬೀತು ಮಾಡಿತು. 2025ರ ವಿಶ್ವ ಟೆಸ್ಟ್ ಚಾಂಪಿಯನ್​ ಫೈನಲ್​ ಪಂದ್ಯದಲ್ಲಿ ಬಲಿಷ್ಠ ಆಸ್ಟ್ರೇಲಿಯಾ ತಂಡವನ್ನು ಸೋಲಿಸುವ ಮೂಲಕ ಕ್ಲಾಸ್​ ಕ್ರಿಕೆಟ್​ಗೆ ಬಾಸ್​ ಆಗಿ ಹೊರಹೊಮ್ಮಿತು.

ವಿಶ್ವದ ಬಲಿಷ್ಠ ತಂಡಗಳಲ್ಲಿ ದಕ್ಷಿಣ ಆಫ್ರಿಕಾ ಕೂಡ ಒಂದು. ಗ್ರೇಮ್​ ಸ್ಮಿತ್​, ಡೇಲ್​ ಸ್ಟೇಯ್ನ್​, ಎಬಿ ಡಿವಿಲಿಯರ್ಸ್​, ಗ್ಯಾರಿ ಕಸ್ಟರ್ನ್, ಜಾಕ್​ ಕಾಲಿಸ್​, ಶಾನ್​ ಪೊಲಾಕ್​​ ಅವರಂತಹ ದಿಗ್ಗಜ ಕ್ರಿಕೆಟಿಗರು ದೇಶಕ್ಕಾಗಿ ಆಡಿ ನಿವೃತ್ತರಾದರೂ, ಐಸಿಸಿ ಟ್ರೋಫಿಯನ್ನು ಗೆಲ್ಲಿಸಿಕೊಡುವಲ್ಲಿ ಮಾತ್ರ ವಿಫಲವಾಗಿದ್ದರು. ತಂಡದ ಕೌಶಲ್ಯದಲ್ಲಿ ಸಮಸ್ಯೆ ಇಲ್ಲವಾದರೂ ಫೈನಲ್​ ಫೋಬಿಯಾ ಮಾತ್ರ ಅವರನ್ನು ಬಿಟ್ಟಿರಲಿಲ್ಲ. ದಕ್ಷಿಣ ಆಫ್ರಿಕಾ ತಂಡವು ಐಸಿಸಿ ಟ್ರೋಫಿಗಳ ಗೆಲುವಿನ ಸಮೀಪಕ್ಕೆ ಬಂದು ಸೋಲು ಕಾಣುವ ಮೂಲಕ ಪ್ರಶಸ್ತಿ ವಂಚಿತವಾಗುತ್ತಿತ್ತು. ಪ್ರಶಸ್ತಿಯ ಗೆಲುವಿನ ಅಂಚಿನಲ್ಲಿ ಎಡವಿದ್ದೆಷ್ಟು ಎಂಬುದನ್ನು ನಾವಿಲ್ಲಿ ನೋಡೋಣ.

ಇದು ನಿಜಕ್ಕೂ ಕ್ರಿಕೆಟ್​ ಲೋಕದ ದರೋಡೆ ಎಂದೇ ಕುಖ್ಯಾತಿಯಾಗಿದೆ. ಅಂದಿನ ವಿಶ್ವಕಪ್​ ಫೈನಲ್​​ನಲ್ಲಿ 253 ರನ್‌ಗಳ ಗುರಿ ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾಕ್ಕೆ ಗೆಲುವಿಗೆ 13 ಎಸೆತಗಳಲ್ಲಿ 22 ರನ್‌ ಬೇಕಾಗಿದ್ದವು. ಈ ವೇಳೆ ಸುರಿಯಿತು. ಡಕ್ವರ್ಥ್ ಲೂಯಿಸ್​ ನಿಯಮದಂತೆ ತಂಡಕ್ಕೆ 1 ಎಸೆತದಲ್ಲಿ ಅಸಾಧ್ಯವಾದ 22 ರನ್​ ಗುರಿ ನೀಡಲಾಯಿತು. ಮಳೆ ಮತ್ತು ತಾಂತ್ರಿಕ ಲೆಕ್ಕಾಚಾರ ತಂಡದ ಗೆಲುವನ್ನೇ ಕಸಿಯಿತು. ಈ ಟೂರ್ನಿಯಲ್ಲೂ ತಂಡದ ಅದೃಷ್ಟ ಕೆಟ್ಟಿತ್ತು. ಆಸ್ಟ್ರೇಲಿಯಾ ವಿರುದ್ಧದ ಸೆಮಿಫೈನಲ್​ ಪಂದ್ಯದಲ್ಲಿ ತಂಡವು ಫೈನಲ್​ಗೇರಲು 4 ಎಸೆತಗಳಲ್ಲಿ 1 ರನ್​ ಗಳಿಸಿದ್ದರೆ ಸಾಕಿತ್ತು. ಕೈಯಲ್ಲಿ 1 ವಿಕೆಟ್​ ಮಾತ್ರ ಬಾಕಿ ಇತ್ತು. ಈ ವೇಳೆ ಆಟಗಾರರ ತಪ್ಪು ನಡೆಯಿಂದಾಗಿ ರನೌಟ್​ ಆಗುವ ಮೂಲಕ ತಂಡವು ಫೈನಲ್​​ಗೆ ಅರ್ಹತೆ ಪಡೆಯುವಲ್ಲಿ ವಿಫಲವಾಯಿತು. ಆಸ್ಟ್ರೇಲಿಯಾ ಫೈನಲ್​ ತಲುಪಿತು.