ಜಾಹೀರಾತು
ಹೈದರಾಬಾದ್: ಭಾರತೀಯ ಫುಟ್ಬಾಲ್ನಲ್ಲಿ ಪ್ರಮುಖ ಬೆಳವಣಿಗೆಯೊಂದು ನಡೆದಿದೆ. ಪುಟ್ಭಾಲ್ ದಂತಕಥೆ 40 ವರ್ಷದ ಸುನೀಲ್ ಛೆತ್ರಿ ಅವರು ತಮ್ಮ ಅಂತಾರಾಷ್ಟ್ರೀಯ ನಿವೃತ್ತಿ ನಿರ್ಧಾರವನ್ನು ಹಿಂಪಡೆದಿದ್ದಾರೆ.
ಫಿಫಾ (FIFA) ನೇತೃತ್ವದಲ್ಲಿ ಇದೇ ತಿಂಗಳಿನಿಂದ 'ಏಷ್ಯನ್ ಕಪ್ ಕ್ವಾಲಿಫೈರ್' ಪಂದ್ಯಗಳು ನಡೆಯಲಿವೆ. ಇದರಲ್ಲಿ ಭಾರತ ತಂಡದ ಪರ ಛೆಟ್ರಿ ಮತ್ತೆ ಮೈದಾನಕ್ಕೆ ಕಾಲಿಡಲಿದ್ದಾರೆ. ಈ ಕುರಿತು ಸ್ವತಃ ಆಲ್‌ ಇಂಡಿಯಾ ಫುಟ್‌ಬಾಟ್ ಫೆಡರೇಶನ್ (AFF) ಸಾಮಾಜಿಕ ಮಾಧ್ಯಮದಲ್ಲಿ ಮಾಹಿತಿ ಹಂಚಿಕೊಂಡಿದೆ.
"ಸುನಿಲ್ ಛೆಟ್ರಿ ಮತ್ತೆ ರಾಷ್ಟ್ರೀಯ ಫುಟ್ಬಾಲ್ ತಂಡಕ್ಕೆ ಹಿಂತಿರುಗಿದ್ದಾರೆ. ತಂಡದ ನಾಯಕ, ಲೆಜೆಂಡರಿ ಆಟಗಾರ ಈ ತಿಂಗಳು ನಡೆಯಲಿರುವ FIFA ಆಯೋಜಿತ ಟೂರ್ನಿಯಲ್ಲಿ ಕಣಕ್ಕಿಳಿಯಲಿದ್ದಾರೆ" ಎಂದು ತಿಳಿಸಿದೆ.
2027ರಲ್ಲಿ ಏಷ್ಯನ್ AFC ಏಷ್ಯನ್ ಕಪ್ಗೆ ಅರ್ಹತೆ ಪಡೆಯಲು ಈ ತಿಂಗಳು ಭಾರತ ಕ್ವಾಲಿಫೈರ್ ಪಂದ್ಯಗಳನ್ನು ಆಡಲಿದೆ. ಮಾ.19ರಂದು ಮಾಲ್ಡೀವ್ಸ್ ವಿರುದ್ಧ ಸೌಹಾರ್ದ ಪಂದ್ಯ ನಡೆಯಲಿದೆ. ಆದರೆ ಮಾ.25ರಿಂದ ಅರ್ಹತೆ ಪಂದ್ಯ ಪ್ರಾರಂಭಗೊಳ್ಳಲಿದೆ.
ಮೊದಲ ಅರ್ಹತಾ ಪಂದ್ಯದಲ್ಲಿ ಭಾರತ ಫುಟ್ಬಾಲ್ ತಂಡ ಬಾಂಗ್ಲಾದೇಶವನ್ನು ಎದುರಿಸಲಿದೆ. ಬಳಿಕ ಜೂನ್ 10ರಂದು ಹಾಂಕಾಂಗ್, ಅ.9ರಂದು ಸಿಂಗಾಪುರ, ನ.18ರಂದು ಬಾಂಗ್ಲಾದೇಶ, 2026 ಮಾ.31ರಂದು ಹಾಂಕಾಂಗ್ ವಿರುದ್ಧ ಕೊನೆಯ ಕ್ವಾಲಿಫೈರ್ ಪಂದ್ಯ ಆಡಲಿದೆ. ಆದರೆ ಛೆಟ್ರಿ ಬಾಂಗ್ಲಾ ವಿರುದ್ಧ ನಡೆಯುವ ಮೊದಲ ಪಂದ್ಯ ಮಾತ್ರ ಆಡಲಿದ್ದಾರೆ.
40 ವರ್ಷದ ಛೆಟ್ರಿ ಜೂನ್ 2024ರಲ್ಲಿ ಅಂತಾರಾಷ್ಟ್ರೀಯ ಫುಟ್‌ಬಾಲ್‌ನಿಂದ ನಿವೃತ್ತಿ ಪಡೆದಿದ್ದರು. ಕೊನೆಯದಾಗಿ FIFA ವಿಶ್ವಕಪ್ ಅರ್ಹತಾ ಪಂದ್ಯದಲ್ಲಿ ಕುವೈತ್ ವಿರುದ್ಧ ಆಡಿದ್ದರು. ಅಂತಾರಾಷ್ಟ್ರೀಯ ಫುಟ್ಬಾಲ್ನಲ್ಲಿ ಹೆಚ್ಚು ಗೋಲು ಗಳಿಸಿದವರ ಪಟ್ಟಿಯಲ್ಲಿ ಛೆಟ್ರಿ 4ನೇ ಸ್ಥಾನದಲ್ಲಿದ್ದಾರೆ. 19 ವರ್ಷಗಳ ವೃತ್ತಿಜೀವನದಲ್ಲಿ 150 ಅಂತಾರಷ್ಟ್ರೀಯ ಪಂದ್ಯಗಳಲ್ಲಿ ಒಟ್ಟು 94 ಗೋಲುಗಳನ್ನು ಗಳಿಸಿದ್ದಾರೆ.
ಅಂತಾರಾಷ್ಟ್ರೀಯ ಫುಟ್‌ಬಾಲ್‌ನಿಂದ ನಿವೃತ್ತರಾಗಿದ್ದರೂ ಛೆಟ್ರಿ, ಇಂಡಿಯನ್ ಸೂಪರ್ ಲೀಗ್‌ನಲ್ಲಿ ಬೆಂಗಳೂರು ಎಫ್‌ಸಿ ಪರ ಆಡುವುದನ್ನು ಮುಂದುವರೆಸಿದ್ದಾರೆ. ಈ ಋತುವಿನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. 12 ಗೋಲುಗಳೊಂದಿಗೆ ಅತಿ ಹೆಚ್ಚು ಗೋಲು ಗಳಿಸಿದ ಭಾರತೀಯ ಆಟಗಾರರಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ. AIFF ಕೋರಿಕೆಯ ಮೇರೆಗೆ, ಛೆಟ್ರಿ ತಮ್ಮ ನಿವೃತ್ತಿಯನ್ನು ಹಿಂಪಡೆದಿದ್ದಾರೆ ಎಂದು ತಿಳಿದು ಬಂದಿದೆ.
