ಜಪಾನ್ : ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಪದಕಗಳ ಬೇಟೆ ಮುಂದುವರಿದಿದ್ದು, ಬುಧವಾರ ನಡೆದ ಪುರುಷರ ಆರ್ಚರಿ ಕಾಂಪೌಂಡ್ ಟೀಮ್ ಇವೆಂಟ್ ಫೈನಲ್ ಪಂದ್ಯದಲ್ಲಿ ಭಾರತ ತಂಡ ಸುವರ್ಣ ಪದಕ ಗೆದ್ದು ಬೀಗಿದೆ. ಸಾಹಿಲ್ ಜಾಧವ್, ಕುಶಾಲ್ ದಲಾಲ್ ಮತ್ತು ಗಣೇಶ್ ಮಣಿರತ್ನಂ ಅವರನ್ನು ಒಳಗೊಂಡ ಭಾರತೀಯ ಪಡೆ ಬಲಿಷ್ಠ ಚೀನಾ ತಂಡವನ್ನು 238-237 ಅಂಕಗಳ ರೋಚಕ ಅಂತರದಿಂದ ಮಣಿಸಿ ಈ ಐತಿಹಾಸಿಕ ಸಾಧನೆ ಮಾಡಿದೆ. ಈ ಅದ್ಭುತ ಗೆಲುವಿನೊಂದಿಗೆ ಕೂಟದಲ್ಲಿ ಭಾರತದ ಒಟ್ಟು ಚಿನ್ನದ ಪದಕಗಳ ಸಂಖ್ಯೆ 10ಕ್ಕೆ ಏರಿಕೆಯಾಗಿದೆ.

ಫೈನಲ್ ಪಂದ್ಯದ ಆರಂಭಿಕ ಸುತ್ತಿನಲ್ಲಿ ಭಾರತ 58-60 ಅಂಕಗಳಿಂದ ಹಿನ್ನಡೆ ಅನುಭವಿಸಿತ್ತು. ಆದರೆ ನಂತರದ ಸುತ್ತಿನಲ್ಲಿ ಭಾರತೀಯ ಬಿಲ್ಲುಗಾರರು ಎಲ್ಲಾ ಆರು ಶಾಟ್‌ಗಳಲ್ಲೂ ತಲಾ 10 ಅಂಕಗಳನ್ನು ಪಡೆಯುವ ಮೂಲಕ ಭರ್ಜರಿ ಕಮ್‌ಬ್ಯಾಕ್ ಮಾಡಿದರು. ಮೂರನೇ ಸುತ್ತಿನಲ್ಲಿ ಚೀನಾದ ಕ್ಸಿಯಾವೊ ಲಿಯಾವೊ 8 ಅಂಕ ಗಳಿಸಿದ್ದರ ಲಾಭ ಪಡೆದ ಭಾರತ, ಕೊನೆಯ ಹಂತದವರೆಗೂ ದೋಷರಹಿತ ಪ್ರದರ್ಶನ ನೀಡಿ ಕೇವಲ 1 ಅಂಕದ ಮುನ್ನಡೆಯೊಂದಿಗೆ ಜಯ ಸಾಧಿಸಿತು.

ಸೆಮಿಫೈನಲ್‌ನಲ್ಲಿ ದಕ್ಷಿಣ ಕೊರಿಯಾವನ್ನು 236-229 ಅಂತರದಿಂದ ಮಣಿಸಿದ್ದ ಭಾರತ ತಂಡ, ಫೈನಲ್‌ನಲ್ಲಿ ಈ ಐತಿಹಾಸಿಕ ಗೆಲುವು ಸಾಧಿಸುವುದರ ಜೊತೆಗೆ 2028ರ ಲಾಸ್ ಏಂಜಲಿಸ್ ಒಲಿಂಪಿಕ್ಸ್‌ಗೂ ಅರ್ಹತೆ ಗಿಟ್ಟಿಸಿಕೊಂಡಿದೆ.