ನ್ಯೂಯಾರ್ಕ್ : ನ್ಯೂಯಾರ್ಕ್ನ ಫ್ಲಶಿಂಗ್ ಮೀಡೋಸ್ನ ಆರ್ಥರ್ ಆ್ಯಶ್ ಕ್ರೀಡಾಂಗಣದಲ್ಲಿ ನಡೆದ ಯುಎಸ್ ಓಪನ್ ಮಹಿಳಾ ಸಿಂಗಲ್ಸ್ ಫೈನಲ್ ಪಂದ್ಯದಲ್ಲಿ ಕಝಾಕಿಸ್ತಾನದ ಎಲೆನಾ ರಿಬಾಕಿನಾ ಬೆಲಾರಸ್ನ ಆರ್ಯನಾ ಸಬಲೆಂಕಾ ವಿರುದ್ಧ 6-4, 5-7, 6-2 ಸೆಟ್ಗಳ ಅಂತರದಲ್ಲಿ ಭರ್ಜರಿ ಗೆಲುವು ದಾಖಲಿಸಿದ್ದಾರೆ. ಈ ಮೂಲಕ ಸತತ ಮೂರನೇ ಬಾರಿಗೆ ಯುಎಸ್ ಓಪನ್ ಪ್ರಶಸ್ತಿ ಗೆಲ್ಲುವ ಸಬಲೆಂಕಾ ಅವರ ಕನಸಿಗೆ ರಿಬಾಕಿನಾ ತಣ್ಣೀರೆರಚಿದ್ದಾರೆ. ಇದು ರಿಬಾಕಿನಾ ಅವರ ವೃತ್ತಿಜೀವನದ ಮೂರನೇ ಗ್ರಾನ್ ಸ್ಪ್ಯಾಮ್ ಪ್ರಶಸ್ತಿಯಾಗಿದೆ.
ಈ ಐತಿಹಾಸಿಕ ಪಂದ್ಯದ ಗೆಲುವಿನೊಂದಿಗೆ ರಿಬಾಕಿನಾ ರ್ಯಾಂಕಿಂಗ್ನಲ್ಲಿ ಸಬಲೆಂಕಾರನ್ನು ಅಗ್ರಸ್ಥಾನದಿಂದ ಕೆಳಗಿಳಿಸಿ ತಾವೇ ಪ್ರಥಮ ಸ್ಥಾನಕ್ಕೇರಿದ್ದಾರೆ. ಸೆಮಿಫೈನಲ್ ತಲುಪಿದ ಬಳಿಕವೇ ರಿಬಾಕಿನಾ ಅವರಿಗೆ ಈ ಅಗ್ರ ಶ್ರೇಯಾಂಕ ಕಸಿದುಕೊಳ್ಳುವುದು ಖಚಿತವಾಗಿತ್ತು. 2024 ಮತ್ತು 2025ರ ಚಾಂಪಿಯನ್ ಆಗಿರುವ ಸಬಲೆಂಕಾ 2023ರ ಫೈನಲ್ನಲ್ಲಿ ಕೋಕೋ ಗೌಫ್ ವಿರುದ್ಧ ಸೋತ ಬಳಿಕ ಇಲ್ಲಿ ಯಾವುದೇ ಪಂದ್ಯವನ್ನು ಸೋತಿರಲಿಲ್ಲ. ಆದರೆ, ಅವರ 20 ಪಂದ್ಯಗಳ ಅಜೇಯ ಓಟಕ್ಕೆ ರಿಬಾಕಿನಾ ತೆರೆ ಎಳೆದಿದ್ದಾರೆ. ಕ್ರಿಸ್ ಎವರ್ಟ್ ಮತ್ತು ಸೆರೀನಾ ವಿಲಿಯಮ್ಸ್ ನಂತರ ಸತತ ಮೂರು ಯುಎಸ್ ಓಪನ್ ಪ್ರಶಸ್ತಿಗಳನ್ನು ಗೆದ್ದ ಮೂರನೇ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲು ಸಬಲೆಂಕಾ ಪ್ರಯತ್ನಿಸುತ್ತಿದ್ದರು.
ತಮ್ಮ ಮೊದಲ ಗ್ರಾನ್ ಸ್ಪ್ಯಾಮ್ ಪ್ರಶಸ್ತಿಯನ್ನು 2022ರ ವಿಂಬಲ್ಡನ್ನಲ್ಲಿ ಗೆದ್ದಿದ್ದ ರಿಬಾಕಿನಾ, ಈ ವರ್ಷದ ಜನವರಿಯಲ್ಲಿ ನಡೆದ ಆಸ್ಟ್ರೇಲಿಯನ್ ಓಪನ್ ಫೈನಲ್ನಲ್ಲಿ ಸಬಲೆಂಕಾರನ್ನು ಮಣಿಸಿ ಎರಡನೇ ಪ್ರಶಸ್ತಿ ಪಡೆದಿದ್ದರು. ಗೆಲುವಿನ ಬಳಿಕ ಮಾತನಾಡಿದ ರಿಬಾಕಿನಾ, "ಇದು ಅದ್ಭುತವಾದ ಅನುಭವ. ಏನು ನಡೆಯಿತು ಎನ್ನುವುದನ್ನು ಅರಗಿಸಿಕೊಳ್ಳುವುದು ಇನ್ನೂ ಕಷ್ಟವಾಗುತ್ತಿದೆ. ಈ ಕೆಲವು ವಾರಗಳಲ್ಲಿ ಹಲವು ಸಾಧನೆಗಳು ನಡೆದಿವೆ. ನಾನು ಅತ್ಯಂತ ಸಂತೋಷವಾಗಿದ್ದೇನೆ ಮತ್ತು ಪಟ್ಟ ಶ್ರಮದ ಬಗ್ಗೆ ಹೆಮ್ಮೆ ಇದೆ" ಎಂದು ತಮ್ಮ ಸಂತಸ ಹಂಚಿಕೊಂಡರು.
ಇನ್ನೊಂದೆಡೆ, ಸತತ ಮೂರನೇ ಬಾರಿಗೆ ಯುಎಸ್ ಓಪನ್ ಪ್ರಶಸ್ತಿಯನ್ನು ಗೆದ್ದು ಇತಿಹಾಸ ನಿರ್ಮಿಸುವ ಉತ್ಸಾಹದಲ್ಲಿದ್ದ ಸಬಲೆಂಕಾರಿಗೆ ಈ ಸೋಲನ್ನು ಅರಗಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ರಿಬಾಕಿನಾ ಚಾಂಪಿಯನ್ಷಿಪ್ ಗೆಲುವಿನ ಅಂಕ ಗಳಿಸಿದ ತಕ್ಷಣ ಹತಾಶೆಗೊಂಡ ಸಬಲೆಂಕಾ ತಮ್ಮ ಆಕ್ರೋಶವನ್ನು ಮೈದಾನದಲ್ಲೇ ಹೊರಹಾಕಿ, ರ್ಯಾಕೆಟ್ ಅನ್ನು ನೆಲಕ್ಕೆ ಬಡಿದರು. ನಂತರ ಕ್ರೀಡಾಂಗಣದ ಪ್ರೇಕ್ಷಕರನ್ನು ಉದ್ದೇಶಿಸಿ ಭಾವುಕರಾಗಿ ಮಾತನಾಡಿದ ಅವರು, "ನಾನು ಇನ್ನೂ ಸ್ವಲ್ಪ ಉತ್ತಮವಾಗಿ ಆಡಬೇಕಿತ್ತು ಎಂದು ಅನಿಸುತ್ತಿದೆ. ಮುಂದಿನ ವರ್ಷ ನೋಡೋಣ" ಎಂದು ಹೇಳಿದರು.