ಭಾರತೀಯ ಪುರಾಣೇತಿಹಾಸಗಳಲ್ಲಿ ಚಿರಂಜೀವಿ ಎಂದೇ ಖ್ಯಾತನಾದ ಭಗವಾನ್ ಪರಶುರಾಮನ ಜನನವು ಧರ್ಮ ಸಂಸ್ಥಾಪನೆಯ ಒಂದು ಮಹತ್ವದ ಘಟ್ಟ. ವೈಶಾಖ ಮಾಸದ ಶುಕ್ಲ ಪಕ್ಷದ ತದಿಗೆಯ ಈ ಸುದಿನವನ್ನು 'ಪರಶುರಾಮ ಜಯಂತಿ'ಯಾಗಿ ಆಚರಿಸಲಾಗುತ್ತದೆ. ವಿಷ್ಣುವಿನ ಆರನೇ ಅವತಾರವಾದ ಪರಶುರಾಮನು ಕೇವಲ ಶೌರ್ಯದ ಸಂಕೇತವಲ್ಲ, ಅವನು ಜ್ಞಾನ ಮತ್ತು ಶಕ್ತಿಯ ಅಪೂರ್ವ ಸಂಗಮ. ಕೈಯಲ್ಲಿ ಕೊಡಲಿ ಹಿಡಿದು ಅಧರ್ಮದ ವಿರುದ್ಧ ಸಿಡಿದೆದ್ದ ಈ ಮಹಾಪುರುಷನಿಗೂ, ನಮ್ಮ ಕರಾವಳಿ ತೀರದ ತುಳುನಾಡಿಗೂ ಇರುವ ಸಂಬಂಧವು ರೋಚಕ ಹಾಗೂ ಪವಿತ್ರವಾದುದು.

​ಪೌರಾಣಿಕ ಹಿನ್ನೆಲೆಯ ಪ್ರಕಾರ, ಪರಶುರಾಮನು ಕ್ಷತ್ರಿಯರನ್ನು ಗೆದ್ದು ಇಡೀ ಭೂಮಿಯನ್ನು ಋಷಿ ಮುನಿಗಳಿಗೆ ದಾನ ಮಾಡಿದ ನಂತರ, ತಾನು ತಪಸ್ಸು ಮಾಡಲು ಹೊಸ ನೆಲವೊಂದನ್ನು ಸೃಷ್ಟಿಸಲು ನಿರ್ಧರಿಸುತ್ತಾನೆ. ಆಗ ಪಶ್ಚಿಮ ಘಟ್ಟದ ಸಹ್ಯಾದ್ರಿ ಶಿಖರದ ಮೇಲೆ ನಿಂತು ತನ್ನ ಪರಶುವನ್ನು (ಕೊಡಲಿಯನ್ನು) ಸಮುದ್ರಕ್ಕೆ ಎಸೆಯುತ್ತಾನೆ. ಪರಶು ಬಿದ್ದ ಜಾಗದವರೆಗೆ ಸಮುದ್ರವು ಹಿಂದೆ ಸರಿದು, ಕಣ್ಣು ಹಾಯಿಸಿದಷ್ಟು ದೂರ ಹಚ್ಚಹಸಿರಿನಿಂದ ಕೂಡಿದ ಸುಂದರ ಭೂಮಿ ಸೃಷ್ಟಿಯಾಗುತ್ತದೆ. ಇದೇ ಇಂದು ನಾವು ಕಾಣುತ್ತಿರುವ ಗೋಕರ್ಣದಿಂದ ಕನ್ಯಾಕುಮಾರಿಯವರೆಗಿನ ಕರಾವಳಿ ತೀರ, ಅಂದರೆ 'ಪರಶುರಾಮ ಸೃಷ್ಟಿ'. ಈ ಭೂಮಿಯು ಕೇವಲ ಮಣ್ಣಿನ ರಾಶಿಯಲ್ಲ, ಬದಲಾಗಿ ಪರಶುರಾಮನ ತಪಃಶಕ್ತಿಯ ಫಲವಾಗಿ ಉದಿಸಿದ ಪುಣ್ಯಕ್ಷೇತ್ರ.

ಈ ಸೃಷ್ಟಿಯ ಕಥೆಯಲ್ಲಿ ತುಳುನಾಡಿನ ನಾಗಾರಾಧನೆಯ ಬೇರುಗಳೂ ಅಡಗಿವೆ. ಸಮುದ್ರದಿಂದ ಮೇಲೆ ಬಂದ ನೆಲವು ಆರಂಭದಲ್ಲಿ ಕೃಷಿಗೆ ಯೋಗ್ಯವಾಗಿರಲಿಲ್ಲ. ಆಗ ಪರಶುರಾಮನು ನಾಗರಾಜನನ್ನು ಪ್ರಾರ್ಥಿಸಿ, ನಾಗಗಳ ಸಹಾಯದಿಂದ ಮಣ್ಣಿನ ಸೌಳನ್ನು ದೂರ ಮಾಡಿ ಭೂಮಿಯನ್ನು ಫಲವತ್ತಾಗಿಸಿದನು. ಆ ಸಮಯದಲ್ಲಿ ಈ ಭೂಮಿಯಲ್ಲಿ ನಾಗಗಳಿಗೆ ವಿಶೇಷ ಗೌರವ ನೀಡಲಾಗುವುದು ಎಂದು ಮಾತು ಕೊಡುತ್ತಾನೆ. ಇದೇ ಕಾರಣಕ್ಕೆ ತುಳುನಾಡಿನ ಪ್ರತಿ ಮನೆಯಲ್ಲೂ, ಪ್ರತಿ ಊರಿನಲ್ಲೂ ನಾಗದೇವನಿಗೆ ವಿಶೇಷ ಸ್ಥಾನವಿದೆ.

ಇಲ್ಲಿನ ಕಲೆ, ಸಂಸ್ಕೃತಿ, ಯಕ್ಷಗಾನ ಮತ್ತು ಆಚರಣೆಗಳಲ್ಲಿ ಪರಶುರಾಮನ ಪ್ರಭಾವವು ಹಾಸುಹೊಕ್ಕಾಗಿದೆ. ಕದ್ರಿ ಮಂಜುನಾಥನ ಸನ್ನಿಧಿಯಿಂದ ಹಿಡಿದು ಉಡುಪಿಯ ರಜತ ಪೀಠದವರೆಗೆ ಎಲ್ಲೆಡೆ ಈ ಮಹಾ ಅವತಾರಿಯ ಅಸ್ತಿತ್ವದ ಅನುಭವವಾಗುತ್ತದೆ. ಪರಶುರಾಮ ಜಯಂತಿಯ ಈ ಸಂದರ್ಭವು ಈ ಪುಣ್ಯಭೂಮಿಯ ಸೃಷ್ಟಿಕರ್ತನನ್ನು ಸ್ಮರಿಸುತ್ತಾ, ನಮ್ಮ ಸಾಂಸ್ಕೃತಿಕ ಪರಂಪರೆಯನ್ನು ಗೌರವಿಸುವ ಸುಸಂದರ್ಭವಾಗಿದೆ.

✍ ಲಲಿತಶ್ರೀ ಪ್ರೀತಂ ರೈ